FRENCH OPEN 2021 : A vawi hnih nan Medvedev a chak
Daniil Medvedev tan French Open-a hnehna chan chu 'changela sawi bel' tum ang maia thil harsa leh inmil lo a ni ṭhin, kuminah erawh thawnthu ziah danglam mek zel a ni - a vawi hnih nan hnehna a chang ve ta!
World number 2 a ni a, seeded pahnihna a ni phak bawk - mahse tournament an khelh hma kha chuan champion chu sawi loh, match khat lek pawh a chak thei ang ngem tih chu tennis ngainatute tana zawhna a ni zawk.
Roland Garros-ah hian a inlan hnuhnung paliah hneh a nei miah loh avangin Medvedev an ring lo hi a mak hran lo. Tun ṭumah erawh a zawnin match hnih a chakna ni turin Tommy Paul chu 3-6, 6-1, 6-4, 6-3 in a hneh.
Hnehna chu
Nilaini zan Paris khawpuia inkhelah Medvedev hi a tirah chuan a che fuh lo hmasa zawk a ni a, set hmasa berah game thum chauh lain set a hloh. Mahse set hnuhnung pahnihah erawh a khingpui service chhuhsak ve ve in a tlang.
Darkar hnih leh minute 18 an inkhelh chhungin player pahnih hian aces (4) leh double faults (2) an neih zat a inang. Ball vaw thiam leh vaw na zawk Medvedev-a'n winners a vuak chhuah hnem chu a chakna hnar pawimawh a ni.
Kum 25 mi Medvedev chuan, "Tommy kha player ṭha leh hriatthiam har tak a ni. A bik takin set hnuhnung berah khan min chhaih buai hle, harsa tak tur nia ka ngaihin ka vaw phei ṭhin a, mahse a lo la thei zel," tiin a khingpui a dahsang thiam hle.
Tsitsipas leh Zverev
Roger Federer, Rafael Nadal leh Novak Djokovic te nek chhuak thei tura ngaih hi an lo chhuak fo tawh a, mahse 'Big Three' ngam thei hi tun thleng chuan an la awm lo. Tun hnaiah player ṭha an rawn chhuak leh mek, an zingah Stefanos Tsitsipas leh Alexander Zverev te an tel.
Seeded pangana Tsitsipas hian Pedro Martinez chu 6-3, 6-4, 6-3 in a hneh a, match hnih a khelh tawhah set a la hloh lo. Season hmasa semifinalist hian third round-ah chuan service nei ṭha John Isner a hmachhawn ang.
Zverev pawhin a vawi khat nan Roland Garros quarterfinal paltlang ngei a la tum zel. German tlangval hian Russian player Roman Safiullin lakah darkar hnih leh minute 27 chhungin 7-6 (7-4), 6-3, 7-6 (7-1) a hnehna changin last 32 a lut.
Tleirawl beiseina
Player ropui pathum Federer, Nadal leh Djokovic ten hun rei tak chhung tennis an thunnun tawh, an pathuma Grand Slam nomawi an lak belhkhawm pawh 58 tehmeuh a ni, a karlakah midang tla zep ve zeuh ṭhin mah se sawi tham an awm meuh lo.
Anni pathum hi kumin French Open-ah chuan an kawngzawh a inang dawn, final hmain an intawng thei dawn - an zinga pakhat chauhin final a lut thei dawn tihna a ni. Kawng lehlamah Medvedev, Zverev leh Tsitsipas te a awm thung, rinkai Dominic Thiem erawh a tla tawh.
Medvedev hian Grand Slam final vawi hnih a khel tawh - Nadal leh Djokovic a ngam lo. Zverev leh Tsitsipas te erawh player ṭha tak ni mah se inelna lianah final an la lut ngai lo, kuminah hian an zinga tu emaw ber hi chuan final khelh theihna remchang an neih ngei a rinawm.
Set nga a ngai
Inkhel dangah Kei Nishikori leh Karen Khachanov an inbei rei hle, darkar thum leh minute 59 an inkhelh hnuah Japan tlangval hian 4-6, 6-2, 2-6, 6-4, 6-4 in hnehna a chang hram, a match hmasa zawkah pawh hnehna chang turin set nga bawk a khel tawh.
Kum 31 mi Nishikori chuan, "Set nga khelh hi a fuh lo," tiin fiamthu in a sawi. Grand Slam hi kar hnih chhung khelh a ni a, a hun chhung a rei avangin thahrui a heh - thlen san leh hlawhtlin duh tan chuan match hmasa lama tha khek thiam a pawimawh ṭhin.
Tun hnaia rawlthar hmuhnawm tak Casper Ruud chuan seeded 15-na Kamil Majchrzak chu 6-3, 6-2, 6-4 in a hneh a, inkhel dangah seeded 11-na Roberto Bautista Agut erawh qualifying paltlanga inlan Laaksonen lakah 6-3, 2-6, 6-3, 6-2 in a chak lo.
