France-in nuamsain Wales an hneh

Euro 2020 nomawi chawi tura beiseiawm ber zinga mi France chuan friendly match-ah tawh an khirh dawn tih an pholang a, Nilaini zan khan Wales chu 3-0 ngawtin an sawp.

Wales rawlthar duhawm Neco Williams chu minute 25-na lekah hnawhchhuah a ni a, video assistant referee hmanga ennawn a nih hnuah Liverpool right back hian a kutin Karim Benzema goal khung tur chu a dang tih chiang takin a lang a, France hi penalty pek an ni.

Mahse, kum ruk dawn hnua a vawi khat nana France tana inlan Benzema chuan he hun ṭha hi goal-ah a chantir thei lo a, Real Madrid striker penalty pet chu Leicester City keeper Danny Ward chuan ṭha takin a dansak.

Benzema-a'n penalty hlah mah se France-in goal khung turin an nghah rei erawh a ngai lo. Minute 34-naah Ward chuan Adrien Rabiot-a shot dang mah se a per lehlam chu Kylian Mbappe chuan zuang chungin a pet lut a, kum 22 mi striker hi goal khung chakin a tuihal tih a lang.

Player tam zawka khel France-in first half-ah goal dang khung lo mah se chawlhlawk hman zawh hnuah goal hnih an rawn khung a, Antoine Griezmann leh substitute Ousmane Dembele-ten goal khat ve ve an khung.

Second half minute hnihnaah Barcelona forward Griezmann hian penalty area pawn hret aṭangin goal chung kil sirah mawi zetin a thlawh lut a, Catalan club tana a khelhpui Dembele chuan Benzema-a post pet per, a per lehlam chu minute 79-naah a khung ve leh bawk.

Wales tan Gareth Bale-a'n inkhel bul ṭan mah se minute 25-na lekah a tlem zawk nichunga an inkhelh nghal avangin danglamna a thlen thei bik lo a, Manchester United winger Daniel James-a'n a hun ṭha neih vawi hnih chu goal-ah a chantir thei lo bawk - Euro 2016-a semifinal khel Wales an tlawm a, mahse, red card an hmuh hma miau avangin hnual nan erawh an hmang duh lo ang.

Juventus midfielder Aaron Ramsey-a'n a thiam a la theihnghilh lo tih pholangin Wales tan a la khel pangngai fu a, June 5 zana Albania nena friendly match khel leh tur Wales hi France laka an result hmanga teh tur chuan a la hma hret mai thei.

Euro 2020-ah Wales hi group A-ah an awm a, Italy, Switzerland leh Turkey-te nen last 16 luh an inchuh dawn a ni. Hetihlai hian France chuan June 8 zanah Euro hmaa an match hnuhnung ber an khel dawn a, Bulgaria nen an inkhel ang.

France hian June 15 zanah Germany nen inkhelin Euro 2020 bul an ṭan dawn a, Die Mannschaft (Germany sawina) bakah hian group F-ah Portugal leh Hungary-te nen an awm ho dawn a, last 16 luh a awlsam dawn lo.