England an chak Arnold a inhliam!

Euro 2020 inbuatsaih nan England chuan Nilaini zan khan Austria nen friendly match an khel a, ram tana Bukayo Saka goal khung hmasak ber hmangin Austria chu 1-0 in an hneh.

England-in hnehna chang mah se lawm a kim lo. Three Lions final squad puan a nih dawna thawm nei lian ber tih ngam Trent Alexander-Arnold chu hliam vanga lakchhuah a ngai a, he thu buatsaih a nih lai hian a dinhmun tur chiang taka sawina a la awm lo.

England boss Gareth Southgate chuan, "Tun aṭanga darkar 24 emaw, darkar 48-ah emaw a dinhmun chiang takin kan hria ang. Malpui hliam niin ka hria a, eng ang taka na nge a nih erawh kan la hre lo," a ti.

Three Lions hian June 6 zanah Romania nen friendly match an khel leh dawn a, Euro khelh hmaa an match hnuhnung ber tur a ni tawh ang - June 13 zanah an match hmasa ber chu Croatia nen an khel dawn a ni.

A kim loin
Southgate-a'n Austria hmachhawn turin a neih ṭhat ber a thawhchhuahpui lo a, Manchester United, Chelsea leh Manchester City player-te chu Europa League leh Champions League final an khelh avangin squad-ah hian telh an ni lo.

England squad-a position ngaihven hlawh ber tih ngam, right back-ah Arnold chu dintir a ni a, Atletico Madrid right back Kieran Trippier chu mual vei lam sirah tlarhnung veng tura dintir a ni thung.

Riverside Stadium-ah England-in goal khung turin an nghah rei a ngai a, an beisei angin an khung lawk thei lo - minute 56-naah Saka a inlar a, Arsenal winger hian mawi taka 'movement' a neih hnuah ram tana a goal hmasa ber a khung.

Kum 19 mi Saka tan ram tana match nga a khelha goal a khungna hmasa ber a ni a, Arsenal tana an khelh laia kum 20 tling lo chunga England tana goal khung Theo Walcott leh Alex Oxlade-Chamberlain-te kiangah a hming a nem kai.

England an nem
Three Lions-in team ṭha pangngai tak an hneh a, chutihrualin an khelh dan aṭanga teh chuan hei aia result chhe zawk nei thei an ni. England tan keeper Jordan Pickford-a che ṭha a, Marcel Sabitzer shot ṭha tak chu bar a nam per a, Ben Godfrey chetsual zarah England hian goal an chhuah teuh viau bawk.

England tana a vawi khat nana inlan Ben White chuan goal line aṭanga ball a petchhuah a ngai a, an ṭhat dan bera an khelh miau loh avangin England-in chhuanlam tur erawh an nei thung.

Southgate-a'n Euro khel tura a thlan zinga tel lo player a inlan tir nual a, Jesse Lingard phei chuan inkhel bul a ṭan - James Ward-Prowse (61 minutes), Ben Godfrey (62'), Ollie Watkins (62') leh Ben White (71') te chu Euro khel lo tur, Southgate-a'n Austria laka a khelhtirte an ni.

England-in hnehna an chan avangin friendly match sarih chhung chu a zawnin hnehna an chang ta a, Sir Bobby Robson hnuaia June 1985 - May 1986 inkara a zawna friendly match pasarih a zawna an chak hnua friendly match-a an record ṭha ber an siam.

Grealish a thiam
England tan Jack Grealish chuan inkhel bul a ṭan a, Aston Villa captain hian an ram tan hmuhnawm khawpin a khel - Euro-ah Three Lions-in thlen san an duh chuan Grealish-a chet ṭhat a pawimawh ang.

Southgate chuan, "Jack Grealish khan inkhel hmuhnawm tak a pho chhuak a, 100% fit turin hma a sawn zel a, player quality tak a ni," a ti a, Grealish hi second half-a lakchhuah a nihin fan-ten ding chungin zahna an lantir hial.

Alexander-Arnold erawh khel ṭha viau mah se hliam avangin lakchhuah a ngai a, Liverpool right back hmel aṭanga enin Euro khelh loh mai hlauhthawnna a awm tih chiang takin a lang.

Southgate chuan, "A dinhmun kan thlir phawt ang a, chumi zawhah thutlukna kan siam ang," tiin a sawi a, Arnold hmun ruak luah tur an koh dawn leh dawn loh a la sawi chiang duh rih lo - Euro ṭan a nih hma chuan player inhliam, damlo, Covid-19 kai emaw positive lo hnaihte chu thlak theih an la ni.