Premier League: Coach transfer a 'hot'! Conte - Spurs; Benitez - Everton?

European football-ah rin loh taka coach bang leh coach inthlak an awm nual a, hetiang boruak karah hian Premier League chu a thawm nei ring pawl an ni leh ta.

Tottenham Hotspur-in rin loh takin Antonio Conte an dawr a, Serie A lama Inter Milan a champion pui hnu lawka chhuahsantu coach hi London club-ah a lut thut a nih pawhin thil mak a ni lo ang. Real Madrid-in Everton duhlai Carlo Ancelotti an chhuhsak hnuah Merseyside club an awm mai mai lo a, hming ri ring zingah Liverpool boss hlui Rafael Benitez hming lam rik a ni!

Euro 2020 khelh a nih dawn bawk si avangin player transfer thawm a lian lutuk lo a, coach transfer chungchang erawh ngaihnawm khawpin sawi tur a tam.

Conte maw?
Spurs-in Jose Mourinho an ban hnuah coach hrang hrang an rim a, an ban tak Mauricio Pochettino hming thlengin lam rik a ni - mahse, Argentine coach hi Paris Saint-Germain lamin chhuahtir an phal lo.

London club hi Julian Nagelsmann, Brendan Rodgers leh Erik ten Hag-te nen pawh sawizawm an ni a, mahse, coach pathum hian an hnar vek - Nagelsmann-a'n Bayern Munich pan a thlang a, Rodgers (Leicester City) leh Ten Hag (Ajax) ten an club awmnaa rinawm an thlang bawk.

Tottenham-in Inter chhuahsan hlim Conte lam an hawi zui a, khawthlang media lam chuan inbiakna chak taka a kal thu an sawi - he thuziak i chhiar meuh chuan an inbe fel tawh hial mai thei!

Chelsea boss hlui Conte hian Spurs a zawm dawn a nih erawh chuan a hlawhah London club hi an insen huai a ngai ang tih a chiang a, khawthlang media-te chuan Spurs hian kum khata pound maktaduai 17 hlawhtir an inhuam niin an sawi.

Ṭhatna & ṭhat lohna
Conte-a'n Inter a chhuahsan chhan kha transfer bazar-ah a beisei ang sum pek an inhuam loh vang a ni a, Spurs hian Italian coach hi hmin an duh a nih chuan bazar-na tur sum an pek hnem a ngai dawn.

Hei mai a ni lo - Conte hi mahni thu duh ve tak a ni a, amah ang thoa mahni thu duh, Spurs chairman Daniel Levy nen hian inlungrual takin an thawk rei dun thei ang em, tih chu zawhna awm mek a ni bawk.

Chutihrual chuan kum 51 mi coach hi champion dan thiam coach a ni a, nomawi chawi hleithei lo Spurs tan chuan ani ang coach 'level' sang lakluh theih hi duhthusam a ni ang. Italian coach hi Premier League-ah a mikhual lo viau bawk - Chelsea chu season hnih a lo enkawl tawh a, Premier League nomawi a chawipui bakah FA Cup-ah a champion pui bawk.

Everton & Benitez
Ancelotti-a'n Real a pan hnuah Everton-in coach an zawng ve nghal a, Rafael Benitez hming chu lam rik zingah a tel. Mahse, Spanish coach tawnhriat nei ṭha hi Everton hmelma kumhlun Liverpool tana hming lo chher tawh coach kha a ni a, Benitez hian Reds-a 'legend' a nihna thlah khawpin Merseyside club hi pan a duh ang em, tih chu zawhna awm a ni.

Hriat tel tur erawh Everton neitu Farhad Moshiri hian European club lian zingah Merseyside club hlankai a duh a, sum a ren lo - hei hi coach tam tak duhthusam a ni a, Benitez hian Everton pan lo ta pawh ni se Wolves boss chhuak ta Nuno Espirito Santo leh West Ham coach David Moyes-te pawh Everton hian an dawr tho nia sawi a ni.

Kum 2002-2013 inkara Everton lo enkawl tawhtu Moyes hian West Ham-ah kum thum dang cham tura contract ziah a remti tawh nia sawi a ni thung a, a kir loh hmel hle - coach pathum zingah club nei lo Nuno tan Everton pan maina chance a sang ber niin a lang.

Everton tan Ancelotti chhuah ruala buaina ni tel nghal chu Italian coach-in Goodison Park-a a lakluh player-te chelh hi a ni a, season khat atana contract la nei mek, Colombian playmaker James Rodriguez leh kum 2023 thleng contract nei, Brazilian midfielder Allan-te hi an pu hlui tel loin Everton-ah an cham duh kher lo mai thei. Coach thar tan anni rilru hneh hi hna hmasa zinga neih tel nghal a ṭul ang.

Palace an lo lang!
Everton-in coach tura an duh zingah Nuno an telh a, ani hi Merseyside club an lo lan hma hian Crystal Palace nen thui tak an lo inbe tawh - coach lakluha pawimawh tel tak pakhat erawh hlawh piahlamah mahni duh ang tak coaching staff chhawm theih a ni a, Everton hian hei hi Nuno hi an tiam thei a nih loh chuan Palace zawm a thlang zawk ang.

Palace hian Nuno chauh an dawr bik lo. Roy Hodgson hmun ruak luah tur hian Bournemouth coach hlui Eddie Howe hming pawh lam rik a ni a, Howe hian Celtic nen thui tak inbiakna kalpui tawh mah se an inrem theih loh avangin Palace an lo lang ve leh zui.

Sheffield United boss hlui Chris Wilder hming chu lam rik zingah a tel a, Championship playoff final-a Swansea City chakpui zo lotu Steve Cooper hming pawh a ri ring viau.

Palace tana buaina lian tak ni mek chu an player zingah contract hmang zo tur an awm nual hi a ni a, director of football Dougie Freedman chuan he contract chungchang hi buaipui mek mah se a tawpa thutlukna siam tur chu Coach an ni dawn a, Palace tan coach ruat vat a ngai tihna a ni.

Wolves boss Lage?
Wolverhampton Wanderers-in Nuno an chhuahtir khan an thutlukna siamin mak tih a hlawh a, mahse, Wolves erawh an dingnghet tlat - an rilruah Benfica boss hlui Bruno Lage an neihsa vang a ni mai thei!

Kum 45 mi coach hi Wolves nen an inbe fel thawkhat tawh a, Football Association lam pawhin a tirah buaina nei mah se Portuguese coach hi English football-a hna a thawh an phalsak tawh. Lage hian kum 2019 khan Benfica chu Primeira Liga-ah nomawi a chawipui a, mahse, beisei anga a season hnihna a hman zui loh avangin June 2020 khan a hna aṭanga chawlhtir a ni.

Kum 2019-a Primeira Liga best coach atana thlan Lage hi English football-ah a mikhual lo a, Sheffield Wednesday leh Swansea City lamah assistant coach hna a lo chelh tawh avangin Wolves-ah a inthlahrung hran lo ang.

Baggies-ah tu nge?
Championship lamah West Brom an tla thla a, Baggies-a Sam Allardyce hmun ruak luah tur hian Sheffield United boss hlui Chris Wilder hming a ri ring viau a, Wilder hi Palace nen sawizawm a nih bawk avangin duh thlang thei a nih chuan Premier League club Palace hi a thlang zawk ang tih a chiang.

Baggies player leh coach (lailawk) hlui Michael Appleton pawh sawi rik a ni a, Lincoln City boss hian a team chu League One playoff final-ah hruai thleng mah se Blackpool an ngam lo a, a hlutna erawh a hniam phah lo.

Scottish club ṭha Aberdeen boss hlui Derek McInnes chu Baggies nen sawizawm a ni bawk a, kum 49 mi coach hian player a nih laia West Brom tana a lo khelh tawh avangin Baggies-a kir hi a hreh lo ang.

Hetihrual hian Championship-a an tlak avangin Baggies hian an player pawimawh an chan nual ang tih a chiang a, England goalkeeper Sam Johnstone leh playmaker Matheus Pereira-te chu chhuak thei dinhmunah an ding mek - coach thar tan hna a awlsam dawn lo.