Olympic a kaltlang ngei dawn - Tokyo 2020 president

Tokyo 2020 president Seiko Hashimoto chuan hrileng karah pawh Tokyo Olympic 2020 chu a kaltlang ngei tur thu a sawi a, chutih rualin infiamna khawmpui lian chu a hmuna entu awm lo turin an in buatsaih mai a ngaih thu a sawi bawk.

July 23 aṭangin Tokyo Games hi neih a ni dawn a, a thlen hmain ni a tam tawh lo hle. A thlengtu tur Japan hi coronavirus vangin an la buai viau a, ram bung hrang tam zawk chu an la inkhuahkhirh mek a ni.

Hashimoto chuan, “Olympic hi kan nei ngei ang tih hi 100%-in ka ring. Tuna a pawimawh lai chu engtianga him leh ṭha in nge kan neih theih ang tih chu a ni,” tiin harsatna karah pawh kaltlangpui ngei an tum.

Harsatna thleng thei sawi zuiin Hashimoto chuan, “Kan tih tur pawimawh tak chu engtin nge mipui sukthlek kan siamrem theih ang tih a ni. Olympic neih laiin hrileng hi a darh hluai a nih chuan harsatna nasa tak a thleng thei dawn.

“Khawvel ram dang aṭanga infiammi lo kalte leh Japan mite ngei pawh inelna hmachhawn tur chu hmun khata dahkhawm dan kan ngaihtuah a, chumi chu a him tur a ni ang. Sawi lawk vek theih la ni lo mah se a hmuna entu awm lo tura inbuatsaih a ngai ang,” a ti.

Ram dang aṭangin Olympic entu an awm theih loh tur thu tih chian a ni tawh a, a thlengtu mipui ngei pawhin an en thei lo a nih chuan a hlutna nasa takin a tlahniam ngei ang tih a rin theih, chutih rualin hripui len lai a nih avangin duhthlan tur dang a awm lo.

Tokyo Olympic neih tur hi sawi a hlawh hle, zirchianna hrang hrang an neihah Japan mipui tam zawkin thlen loh emaw, a hun sawn leh mai emaw duhtu an tam zel. Mahse, nikuma neih tur kumina sawn tawh a nih avangin sawn nawn theih a ni dawn lo thung.

Tunkar hian Australia hmeichhe softball team chuan Thawhlehni khan Japan ram an thleng tawh, ram dang aṭanga Olympic hmachhawn tur zin lut hmasa ber an ni - ram dang pawhin an infiammi an thawn lut zel dawn.

Tun thleng chuan ram lian ho zingah Olympic aṭanga inhnukdawk an la awm lo. India pawhin a tel theihna zawng zawngah infiammi tirh a tum a, infiamna ṭhenkhatah erawh inlan tur a la chiang kim thei lo thung a ni.