Harsa takin Serena a chak

Serena Williams chuan French Open third round a in hlangkai. Nilaini zan Paris khawpuia inkhelah American star hian Mihaela Buzarnescu chu 6-3, 5-7, 6-1 in a hneh a, a match lehpekah chuan Danielle Collins nen an inkhel ang.

Kum 39 mi Serena hian hun rei tak chhung chu Margaret Court-i record (24 titles) a um tawh, Grand Slam nomawi 23 a chawi hnuah a la hlawhtling leh thei rih lo - major tournament final a khelh hnuhnung pathumah a chak lo vek.

Hlawhtlin ngei tumin Paris khawpui a pan a, clay court hi a tan hmun duhthusam ni lo mah se thapui a thawh. A tumruhna hian eng chena thui nge a hruai theih dawn chu kan hre chhunzawm ang.

Seeded pasarihna Serena chuan, “Buzarnescu kha player ṭha tak a ni, a bik takin clay court-ah a inkhel thiamin a khel ṭha hle bawk. Player thiam tak kan hneh a nih chuan a lawmawm zual bik ṭhin hle.

“Inelna nuam leh hlimawm a ni a, tuna ka dinhmun leh khelh danah ka lawm hle. Nuam ti taka kan khel a nih hi chuan result ṭha pawh a lo thleng mai ṭhin, inelna hi nuam ti tak chungin rilru zawng zawnga khelh theih a pawimawh,” tiin a sawi.

Serena ang thoin player langsar dang Aryna Sabalenka, Victoria Azarenka leh 2019 finalist Marketa Vondrousova te pawhin second round an paltlang a, seeded 10-na Belinda Bencic erawh Daria Kasatkina hneh loin a zin kawng a tawp thung.

Belarus nula Azarenka hian tleirawl Clara Tauson lakah 7-5, 6-4 in hnehna a chang a, third round-ah Madison Keys nen an inkhel leh ang; Keys hian kum 18 mi Leylah Annie Fernandez chu 6-1, 7-5 in a lo hneh ve bawk.

Sabalenka pawhin amah ang bawka Belarus player Aliaksandra Sasnovich chu 7-5, 6-3 in a hneh a, seeded 20-na Vondrousova chuan darkar khat leh minute hnih chhung lekin Harmony Tan 6-1, 6-3 in a hneh.

Hmeichhe singles huanga inlan pahnih Coco Gauff leh Venus Williams te chu doubles-ah an inkawp a, American player pahnih hian beisei an phak lo - Ellen Perez leh Saisai Zheng ṭangdun lakah 6-7 (5-7), 6-4, 6-3 in an chak lo.