Euro 2020 atan Germany an la inpeih lo

Joachim Low-a'n tawnhriat nei ṭha player pahnih Thomas Muller leh Mats Hummels te ko leh mah se Germany hi Nilaini zana Denmark nena an khelh dan aṭanga thlirin Euro 2020 atan an la inpeih lo.

Tivoli Stadion Tirol, Austria-ah Germany tan Florian Neuhaus-a'n minute 48-naah goal hmahruai a khung a, Denmark-in Yussuf Poulsen hmangin minute 71-naah an sut a, 1-1 in inkhel a tawp.

Muller-a telna
Joachim Low-a'n Bayern Munich player paruk ngawt bul a ṭantir a, tlarhma lamah Borussia Monchengladbach midfielder Florian Neuhaus tih loh chu Bayern player vek an ni.

Kum 24 mi Neuhaus hi midfield laiah Joshua Kimmich nen inkawpin Muller, Serge Gnabry leh Leroy Sane te hmangin goal an nawr. Tlarhnung pathumah Niklas Sule a tel a, Bayern defender hi Mats Hummels leh Matthias Ginter te nen a laiah an ding.

RB Leipzig right back Lukas Klostermann chu wing back atan chhawr a ni a, vei lamah Atalanta left back Robin Gosens a awm ve bawk. Goalkeeper-ah captain Manuel Neuer a awm a, ani hi chu bul ṭan tur chiangsa a ni.

A na tawk lo
Germany-in bul an ṭan chhe lo a, Neuhaus-a'n Denmark keeper Kasper Schmeichel tan hna a siam nghal. Muller-a'n chance ṭha bik a hlah a, Joshua Kimmich-a ball vawrh luh ṭha zet chu Muller-a'n vengtu a nei lo chungin keeper zawnah chauh a a tauh.

Leroy Sane pawhin Neuhaus-a cross chu a pet over a, Serge Gnabry-a'n box pawn aṭangin kawh zetin crossbar a pet per bawk. Denmark-in chance a nei lo a, first half-ah goal a lut lo.

A goal ta
Second half-ah Germany an vannei ta a, minute 48-naah box chhung buai nuaih karah Gladbach midfielder Neuhaus-a'n goal hmahruai a khung.

Atalanta wing back Gosens pawhin Kimmich-a hnen aṭanga a ball hmuh chu la lutin goal zawnah pet mah se keeper Schmeichel-a'n a dansak.

Minute 71-naah Denmark-in chance ṭha hmasa ber a ni a, Christian Eriksen 'through ball' chu Yussuf Poulsen-a'n um lutin siphurh sutna goal a khung. Inter Milan midfielder Eriksen-a ball pet thiam sia sawi nawn a ngai lo a, chutihrualin Bayern defender Sule-a position dik tawk loh vanga goal-ah a ngaih theih bawk.

Germany an vanduai tel a, Kimmich-a'n minute 75-naah goal ban a pet per. Joachim Low-a'n hun tawp lamah Kevin Volland, Jonas Hofmann leh Christian Gunter te luhtir mah se goal hmuh tur a awm belh lo.

Germany chu
Denmark-in Europe league liana khel player an nei nual a, chutihrualin Germany tan Kasper Hjulmand leh a hote nena inhnehtawk hi result ṭha a ni lo.

Joachim Low-a'n Muller a koh let khan Bayern Munich khelh dan mila khelh a tum tih sawi a awm, amaherawhchu Denmark nena an khelh dan aṭang chuan a inang lo tih a chiang.

German coach Jurgen Klopp, Thomas Tuchel, Hansi Flick leh Julian Nagelsmann te chu tun hnaia coach ṭha ber zinga mi an ni a, khelh dan nghetin an goal bawh a na vek. Low erawh a fimkhur a, 3-4-3 formation a hmang a, goal venhim a ngaih pawimawh bakah an khingpuite presure an pe na tawk lo.

Germany-in wing back atana an hman Klostermann leh Gosens te club lamah mual sirah awm mah se an club khelhnaah defender pali an awm. Low a hnuaiah erawh defence laiah mi pathum an awm a, Klostermann leh Gosens ten mual sirah zalenna nei mah se an nawr na tawk lo.

Tlarhnung panga chhawr chungchang hi Low-a'n a en nawn a ṭul dawn. Chutihrualin Denmark nen hian player pawimawh tura ngaih Chelsea player Antonio Rudiger, Timo Werner leh Kai Havertz bakah Real Madrid midfielder Toni Kroos leh Bayern midfielder Leon Goretzka te an la tel lo tih erawh hriat a ṭha.

Eng nge an sawi?
Germany boss Joachim Low chuan, "Lawmna tur a awm a, siam ṭhat ngai a la awm bawk. Tlarhnung a phui ṭha a, kan tihsual lai erawh a pawi. Zirtawpni aṭang chauhin team kimin training kan nei dawn a, kar khat chhung insiamṭhatna hun kan nei ang," tiin a sawi.

Bayern Munich forward Thomas Muller chuan, "Inkhel a rang a, tlan tam a ngaih avangin duh angin kan khel ka thlir let lo. Ṭum hnih woodwork kan tih per a, kan vanduai. Kan lama goal luh dan a ho bawk a, chutihrualin Denmark hi team dang tihsual hrem thei turin an ṭha ve hrim hrim bawk," tiin a sawi.

Germany hian June 7, Thawhṭanni zanah Latvia an hmachhawn dawn. Low-a hote hian Euro match hmasa berah France an hmachhawn nghal dawn a, group F-ah Portugal leh Hungary an awm bawk avangin last 16 thlen pawh a harsa dawn.