Hun ṭha zawk a rawn la thleng dawn - Telles

Brazilian left back Alex Telles chuan Manchester United-a season hmasa ber a hman danah a lungawi thu a sawi a, hun ṭha zawk a rawn la inher chhuah tur thu a sawi tel bawk.

Kum 28 mi Telles chuan, "Season ṭha tak ka hmangin ka hria. Thil tam tak ka zir a, kawng tam takin hma ka sawn. Season khatna hi a harsa ṭhin a, ka hun ṭha neih te ka hmang ṭha viauah ka ngai. Tun aia ṭha zawk hian ka la khelh theih ka ring," tiin a sawi.

Telles hian Manchester United a zawm hnuah Covid-19 positive vangin a chawlh a ṭul a, nasa taka Luke Shaw-a'n hma a sawn avangin khelhna hmun a chang tam lo.

FC Porto aṭanga Manchester United zawmtu Telles hian league match pakua chiah a khel a, inelna hrang hrangah match 24-ah chiah a inlan.