Ka inah ka rawn kir e - Ancelotti

Real Madrid chuan June 2, Nilaini khan manager thar Carlo Ancelotti chu dan ang thlapin an lalut a, thuthar thehdartute a hmachhawn nghal.

A mikhual lo
Italian manager Ancelotti hian kum 2013-2015 chhung khan Real Madrid hi a enkawl tawh a; Copa del Rey, Champions League, FIFA Club World Cup leh UEFA Super Cup-ah a champion pui.

Kum 61 mi Ancelotti chuan, "Real Madrid hi mahni in ang maia ka ngaih a ni a, ka inah ka rawn kir e. Tun hmaa kan hlawhtlinna chan ang kha nei leh turin ka theihna zawng zawng ka hmang ang," tiin a sawi.

Real thar = Real ngai
Real Madrid-in Champions Legue semifinal an thleng a, La Liga-ah pahnihna an ni. Amaherawhchu UCL-ah hian Chelsea lakah an mualpho a, La Liga nomawi inchuhnaah pawh an chesual ngun hle.

Ancelotti chuan, "Club hian kalphung a nei a, chu chu attacking football khelh a, entute tana hmuhnawm chhuahsak a ni. Tun hnai kum nga chhungin nasa takin football kalhmang a inthlak a, footbal dan (law) thlengin a danglam.

"Amaherawhchu Real Madrid kalphung erawh attacking football a ni tur a ni a, a hmuhnawm tur a ni. Club history kan en let pawhin attacking football hi Real kalhmang a ni a, fan-te duh dan pawh a ni," tiin a sawi.

Squad chungchang
Spain coach Luis Enrique-a'n World Cup khel tur squad a puang a, Real Madrid player an tel lo. Enrique hi a ti mah mah a ni thei a, chutihrualin Los Blancos hi an ṭha tawk lo tih erawh pawm a ṭul thung.

Real manager thar Ancelotti chuan, "Real Madrid player-te hi ka hrechiang a, academy-a awm mekte leh loan-a hun hmang zote thlengin ka hria. Duh thlan tur ṭhahnem tak ka neiah ngai. He club ka enkawl hmasak khan Morata, Nacho, Casemiro leh Jese ten academy aṭangin min zawm. Bayer Leverkusen aṭanga loan hmang zo Carvajal te nen khan team ṭha tak kan din." tiin tun hma angin an academy 'Castilla' aṭanga player chhawr tur an awm a rin thu a sawi.

Eden Hazard chungchang sawi zuiin Ancelotti chuan, "Player ṭha bik a ni. Inhliam vangin a buai a, a theihna tak a la thleng loah ka ngai. Season thar hi Hazard-a tan hun ṭha a ni thei ang," tiin beiseina a neih san thu a sawi.

Player neih sa an ṭhat thu sawi belhin Italian manager chuan, "Benzema hian goal 50 a khung tur a ni a, goal 30 ni loin. Vinicius Jr hian tun aiin goal a khung tam turah ka ngai. Player thar melh ringawt loin kan neih sa, ṭha sa aṭangin goal khung tam dan kan zawn a ṭul. Bale, Odegaard leh Ceballos te an rawn kir dawn a, Europe team ṭha dang el pha turin an ṭha tawk a ni," tiin a sawi.

Mbappe leh Ronaldo
Real Madrid hi PSG forward Kylian Mbappe leh an player hlui Cristiano Ronaldo nen sawi zawm a ni. Ancelotti chuan, "Player ṭha bik an awm chuan nomawi chawi theihna kawng a inhawng zau sawt. Team anga khelh phawt a ṭul a, chumi kan tih theih hnuah chuan mimal ṭhatna a pawimawh ṭhin," tiin Mbappe-a'n team a tih ṭhat theih thu a sawi.

Ronaldo chungchang sawiin Ancelotti chuan, "Ronaldo hi ka ngaina a, chutihrualin club dang player hi chungchang hi chu sawi nuam ka ti lo. Juventus-ah contract a la nei a, a chungchang sawi a rem lo. Goal 50 khung ṭhin kha a ni a, tunah goal 30 a la khung thei a, tun hma pha lo mah se a la ṭha hle a ni," tiin a sawi.