Ka cham dawn - Lukaku

Inter Milan striker Romelu Lukaku chuan San Siro chhuahsan tumna a neih loh thu a sawi a, season tharah pawh Inter tana khelh chhunzawm zel chu a tum dan a nih thu a sawi chiang.

Manchester United leh Chelsea tan pawha khel tawh Lukaku hian 2019 khan Inter hi a zawm a, a man zat chu pound maktaduai 74 zet a ni. Serie A club tan hian match 95 a khelh aṭangin goal 64 a khung tawh.

Antonio Conte kaihhruaina hnuaiah Lukaku hian nasa takin hma a sawn, season liamta khan Italian champion an ni hial a - kum 11 liam hnuah Serie A title an la thei ve leh chiah.

Manager Conte a chhuak a, striker Lukaku pawh chhuak tur angin thawm a awm nghal. Belgium internatonal chuan, "Inter-ah hian ka hlim tawk, ka cham ang. Kan manager thar nen pawh kan inbe tawh, champion leh ngei chu kan thil tum a ni," a ti.

Lukaku hian European Championship a khel dawn. Belgium hi Group B-ah Russia, Denmark leh Finland te nen an awm khawm.