Leicester leh Vardy an tho chhuak ta

Thawhṭanni zan Premier League-ah Leicester City chuan League Cup finalist Aston Villa 4-0 in an sawp a, Harvey Barnes leh Jamie Vardy ten goal hnih ve ve an khung. 

Foxes hian league match li chhung chak hmel an hmuh tawh loh hnuah hnehna an chang a, match 29-ah point 53 hmuin Champions League khel turin an dinhmun a ṭha sawt. Aston Villa erawh match 28-ah point 25 hmuin relegation zone an la chhuahsan thei lo.

King Power Stadium-ah Aston Villa-in bul an ṭan chhe lo a, goal chance ṭha pawh an nei hmasa zawk. Jack Grealish aṭanga ball chhuak chu Matt Targett-a'n box chhungah ṭha zetin cross mah se Conor Hourihane-a'n a a pet fuh lo. Grealish bawk a langsar a, English midfielder cross chu Tanzanian forward Mbwana Samatta-a'n goal khung nan a hmang ṭangkai thei lo.

Leicester City an insiam ṭhat hnuah Jonny Evans-a'n ṭha taking tauh mah se Pepe Reina-a'n a dang a, Liverpool keeper hlui hian Barnes-a goal khung tur a dang zui leh bawk. Minute 40-naah Reina-a'n Barnes-a through ball um chu dan hman beiseiin box pawnah a tlan chhuak a, English midfielder hian Spanish keeper hi bumin keeper awm lohna goal-ah defender pahnih awm mah se 'cool' takin a khung. Reina tihsualin Leicester City chu dinhmun ṭha zawkah a dah a, Brendan Rodgers-a hoten halftime-ah goal khata hma an hruai avangin second half-ah game plan dang an chhawp theih phah.

Vardy a inlar 

Leicester City-in Jamie Vardy goal khung theih zar zoin season ṭha tak an hmang a, amaherawhchu English striker hi hliam vangin tun hnaiah a inlan mumal lo. Villa nen pawh hian Vardy hi bench-ah a ṭhu a, English striker hian December 21 hnuah Premier League-ah goal a la khung leh lo.

Minute 59-naah Vardy-a'n Kelechi Iheanacho a rawn thlak a, minute li hnuah kum 33 mi striker hian penalty aṭangin goal a khung nghal. Villa defender Tyrone Mings-a'n ṭul lo takin Barnes-a cross chu a kutin a khawih a, penalty a chawi avangin Vardy-a'n a ball khawih hmasak ber chu goal-ah a chantir.

Minute 79-naah Vardy-a'n box chhungah ṭha takin a lalut a, a ball cross chu Frederic Guilbert-a'n dang mah se a per chu Vardy hian goal-ah petin Leicester City goal thumna a khung. Foxes-in inkhel chawhnu lam an thunun a, Marc Albrighton-a cross chu kum 22 mi Barnes-a'n mawi zetin a khung. 

Aston Villa-in League Cup final-ah Manchester City an hneh lo a, league match hnuhnung paliah an chak lo vek bawk. Villa manager Dean Smith chuan, "Mimal tihsual kan tuar a, insiam ṭhat kan ngai hle. Kan khingpuite khan kan tihsual an hmang ṭangkai a, tun hnaiah kan inrintawkna a tlahniam nasa a ni," tiin insiamṭhat an mamawh thu a sawi.

Leicester City manager Brendan Rodgers chuan, "Hun eng emaw chhung kha chuan kan theihna angin kan khel chhuak lo. Tun ṭumah erawh kan goal nawr a na tawh a, goal hmasa ber kan khung hnu phei kha chuan kan khel ṭha hle," tiin a sawi.

March 9, Thawhṭanni Zan

Leicester City    4 - 0    Aston Villa

LEI : Harvey Barnes 40', 85'; Jamie Vardy 63' (P), 79'

Zanin Inkhel Tur

Manchester City    01:00 AM    Arsenal