Vaccination policy chungchangah SC-in sorkar laipui a khak

Supreme Court chuan sorkar laipui chu Covid vaccination policy a kalpui danah Nilaini khan a khak.

Sorkar laipuiin vaccine siamtute hnen aṭanga a hlawma a lak avanga man tlawm taka a lei theih laia, state sorkarten a hrana man to zawka an lei chungchang chu zawtin Supreme Court chuan, "Engvangin man tlawm taka i lei thei anih chuan a vaia i lei mai loh?," a ti. Sorkar laipui hian vaccine hi Rs 150-a a lei theih laiin state-te chuan Rs 300 - Rs 600 inkarin an lei thung.

Sorkar laipui chuan vaccine leina atan budget Rs vbc 35,000 a nei a, sum thehchhuah tur hi a tam avangin vaccine leina atana state sorkarin sum lamah harsatna tak an tawh ang chu a nei ve lo, a ti. Liberalised Vaccination Policy hnuaia sorkar laipuiin vaccine leina atana fund a hman dan sawifiah tur leh, kum 18-44 inkarte vaccine pekna atana hman a nih lohna chhan hi sawifiah turin Court chuan a hriattir. He policy hnuaiah hian sorkar laipui chuan Covid-19 vaccine hi 50% leiin, a bak 50% dang chu state/UT leh private hospital-ten an lei thei a ni.

Court chuan sorkar laipui chuan state hnena vaccine hralh theih leh man tur zat hi a siamtute nen a ruahman lawk avangin, state-te tih theih dang a tlem hle a ni, a ti. Vaccine indaih lohna avanga state sorkarte ram danga vaccine siamtute an dawrnaah pawh, a siamtute hian sorkar laipui zawk dawr an duh ṭhin avangin state sorkar tan thil tihfel mai a har ṭhin a ni, tiin a sawi.

Supreme Court chuan sorkar laipuiin state/UT sorkar tinten a thlawnin vaccine hi an pe chhuak vek dawn nia sawi chungchang chu sawifiah turin state-te a zawt bawk. Kar hnih chhung affidavit thehlut a, vaccine a thlawna pek chhuan an tum dan policy ṭheuhte sawifiah turin a ti a ni.