Nuggets lakah Bucks an tlawm

Giannis Anteto-kounmpo tel loa khel Milwaukee Bucks an che fuh lo chhunzawm, nimin zing khan Denver Nuggets lakah 109-95 in an tlawm - tun hnai an match hnuhnung pathumah an chak lo vek.

Bucks tan hian Most Valuable Player (MVP) ni lai Antetokounmpo chu a khup hliam vangin a la inlan thei lo. Star player awm loh laiin Kyle Korver chuan point 23 ei thei mah se thlawptu a nei ṭha tawk lo a, a team a chakpui zo lo.

Denver lamah mimal che ṭha fal sawi tur awm lo mah se Jamal Murray (21 points), Paul Millsap (20) leh Jerami Grant (19) te an khel ṭha rual a, anmahni aia team ṭha zawk lakah hnehna an chang.

Chak lo mah se Bucks hi playoff khel turin an tling chiang tawh, regular season kal laiah vawi 53 chak tawhin ṭum 12 an tlawm. Nuggets pawh Western Conference lamah pathumna an ni zel a, playoff khel turin la tling chiah lo mah se an dinhmun a ṭha tawh thawkhat hle.