ATK tan hna a awlsam

Pathianni zan Indian Super League inkhelah ATK chuan 3-0 in Jamshedpur FC an sawp a, league match 15 khelh tawhah FC Goa nen point 30 ve ve hmuin table chung ber an luah leh ta. 

ATK tan hian striker hlawh hnem Roy Krishna chuan goal hnih a khung a, kum 29 mi Edu Garcia chuan goal khat khung ve leh bawkin 3-0 in an chak. 

Season khata nuai 400 chuang hlawh nia an sawi Krishna hian ISL-ah match 15 khelin goal 10 a khung tawh a, assist vawi nga a nei bawk - table chung bera ATK awm nan tha a thawhhlawk hle. 

Fiji international hi season hmasa khan A League-ah goal 19 khungin top scorer a ni a, ISL khelh mekah Nerijus Valskis (12 goals) leh Bartholomew Ogbeche (11) chiah a tluk rih lo. 

Nizanah ISL inkhel a awm lo a, zaninah match a awm dawn lo bawk - Nilaini zanah FC Goa chuan Hyderabad an mikhual ang.