Australian GP-ah entu awm thei dawn

Formula 1 season thara intlansiak hmasa ber tur Australian Grand Prix chu a hmunah mipuiin an en thei dawn, inelna hi tun kar tawp hian Melbourne khawpuiah neih a ni ang.

Coronavirus vangin Shanghai Grand Prix chu a hun sawn a ni tawh a, Vietnam GP dinhmun a chian loh bakah Bahrain Grand Prix chu fans awm loa tlan a ni dawn. Hri leng karah Australian GP chu a pangngaiin a kal thei dawn a ni.

Australian Grand Prix Corporation chief Andrew Westacott chuan, "Mipui himna kan ngai pawimawh a, chutihrualin a invenna lam chu kan theihtawpa ṭhain kan siam dawn, inelna kan neih tur hian hri leng a tih punlun loh kan beisei," tiin a sawi.

F1 team tam zawk hi England-a hmunpui nei an ni a, team hlun Ferrari erawh Italy-a innghat an ni thung. European ram zingah Italy hi Covid-19 kai tamna an nih avangin ram tam tak chuan an rama zin turin an duh vak lo.

Westacott chuan, "Ferrari leh Alpha Tauri car te chu kan ram lam panin an rawn kal mek tawh, kalkawngah harsatna an tawk lo niin kan hria a, a lawmawm hle," tiin a sawi. Australian Grand Prix hi entu an ṭhahnem ṭhin a, kuminah pawh Albert Park-ah mipui 3,00,000 chuang an pungkhawm leh tura ngaih a ni.