Piancham lawm nan Nadal a chak
Nikir thla 3, Nilaini zan a ni a - vanduai ṭum chu ni se Paris khawpuia French Open khelh lai chu ruah sur vanga kaihlak thei a ni. Boruak a thiang nuam viau thung a, clay court lalpa Rafael Nadal-a'n a kum 35 piancham lawm nan Richard Gasquet a hneh.
Hripui leng lo se la chuan Philippe-Chatrier chhungah Nadal inkhel en turin mipui an khat ang. Tun ṭumah erawh hrileng vangin Nadal-a'n darkar hnih leh minute 14 chhunga tennis hmuhnawm bik a chhawp chhuak lai a hmuna en theitu an tlem hle.
Second round inkhel dangah Roger Federer leh Novak Djokovic ten an khingpui ve ve an hneh, player ropui pahnih hi an kaltluang a nih chuan quarterfinal-ah an inhmachhawn thei dawn; a chak zawkin semifinal-ah Nadal an tum a ngai bawk ang.
Dan rual loh
Tennis player ten inkhelh thiam bikna hmun an nei zel. Nadal tan French Open chu vanram tlafual a ni ringawt. World number 3 hian Gasquet hi 6-0, 7-5, 6-2 in a sawp! A service vawi khat chauh a hloh a, a khingpui service vawi sarih a chhuhsak.
French Open vawi 13 champion tawh Nadal chuan, "Set khatna kha khatiang em em a ṭha khan ka khel ang tih ka ring phak bik lo. Richard a vanduai, hun harsa tak a paltlang hnua inkhel leh a nih avangin ka zah hle," a ti.
Nadal leh Gasquet te hi vawi 17 an inhmachhawn tawh a, kum 12 mi chauh an nih laiin French Open Junior huangah an intawng ṭan tawh - an inkhelh tawh zawng zawngah Nadal a chak vek, chungnung viau mah se a khingpui erawh a zah thiam hle.
Grand Slam vawi 20 champion tawh Nadal-a'n zaninah Cameron Norrie a hmachhawn leh dawn. Britain tlangval hian Lloyd Harris chu 4-6, 6-3, 6-3, 6-2 in a hneh. Dan Evans, Johanna Konta leh Heather Watson te an tlawk tawh vangin Britain player dam la awmchhun a ni.
Hei le Roger
Roger Federer-a'n hliam vanga hun khirh tak a hman zawh hnuah inelna hautak a hmachhawn thei a ni tih fiah a duh a, a vanglai angin a taksa chak tawk tawh lo mah se a thiamna erawh a la tlahniam chuang lo.
Swiss star hian darkar hnih leh minute 35 chhungin US Open champion hlui Marin Cilic chu 6-2, 2-6, 7-6 (4), 6-2 in a hneh. Roger hian third round-ah German player Dominik Koepfer a hmachhawn chhunzawm leh ang.
Kum 39 mi Federer chuan, "Hun rei tak chhung chu inelna lian ka hmachhawn tawh lo, tun ṭumah hian ka beisei aia ṭhain ka khel. A bik takin ka service a ṭha leh ta hi ka lawm," a ti. Cilic lakah hian vawi 16 ngawt aces a vaw chhuak.
Federer tan clay court hi hmun ṭha a ni ngai lo. Mahse, July thla a khelh tur Wimbledon atan inbuatsaihna hautak leh ṭha neih a duh, Paris khawpuiah hian tun hma lama a taksa paukhauh tak ang kha neih let tumin a bei mek a ni.
Novak a class
World number 1 a ni a, seeded pakhatna pek a ni bawk - Novak Djokovic tan buaina tur a la awm lo. Serbian star hian tun hma lama a la hmachhawn ngai miah loh Pablo Cuevas a tum a, darkar hnih leh minute ruk chhungin 6-3, 6-2, 6-4 in a hneh.
Kum 34 mi Djokovic hian last 32-ah Ricardas Berankis a hmachhawn leh dawn. Paris khawpuiah hian 2016 khan hlawhtlinna a lo chang tawh a, tun ṭumah hian a vawi hnih nan nomawi chawi leh ngei a tum.
Grand Slam vawi 18 champion tawh Djokovic hian major title la hnem ber nih a duh thu a lo sawi fo tawh a, vawi 20 champion tawh Federer leh Nadal te khum a duh a nih chuan French Open title lak hi a pawimawh dawn hle.
Inkhel dangah Matteo Berrettini leh Diego Schwartzman te chu straight set hmangin an chak a, tualchhung player zinga beisei awm Gael Monfils erawh Mikael Ymer lakah a chak lo. Kum 18 mi Carlos Alcaraz chu 1992 hnu lama third round lut thei naupang ber a ni thung.
