Champion lai Lakers an tla

Los Angeles Lakers chu NBA playoff-ah Phoenix Suns hneh loin an tla. Nimin zing khan Lakers hi 113-100 in an chak lo a, best of seven series chu Suns lamin 4-2 a lain conference semifinal an inhlangkai.

Suns tan Devin Booker-a'n point 47 zet a nei a, chakpui nan a tawk. Lakers erawhin LeBron James (29 points) an chakpui zo lo, an thiampuipa Anthony Davis chu damkawr chungin chhawr mah se minute nga bak a inlan thei lo.

Hnehna changtu Suns hian Western Conference semifinal-ah chuan Denver Nuggets an hmachhawn chhunzawm ang. Nuggets hian Portland Trail Blazers lakah 4-2 in series an lo la ve bawk a ni.

Kum 2015 khan San Antonio Spurs chu NBA champion ni chungin playoff-ah hneh nei loin an tla, a hnu lamah chuan Lakers hi champion ni chunga hneh nei loa chak lo leh hmasa ber an ni leh ta chiah.

Suns chak puitu Booker chuan, "Hetiang hun thleng tur hian tun hma aṭangin ka lo nghak ngar ngar tawh. Hun rei lote chhung insawngbing khan danglamna a thlen thei tih ka hria a, chuvang chuan theihna zawng zawng ka hlan," tiin a sawi.

Chak lo James tan erawh chanchin ṭha lo bik a ni. NBA champion vawi li ni tawh hian NBA playoff vawi 14 a khel tawh a, tun ṭum hi semifinal thleng loa a zinkawng a tawp hmasak ber ṭum a ni hial.