Mayweather vs Logan Paul Boxing tan a ṭha nge ṭha lo?

Thawhṭanni zing dar 5:30-ah boxing khawvela hming dai tawh ngai lo tur Floyd Mayweather chu YouTube star Logan Paul nen an inhnek dawn a, fighter pahnih inhnek tur hian sawi a hlawh hle.

Boxing fans tam tak chuan social media kaltlanga inti lar, Logan Paul-a'n Mayweather a hmachhawn tur hi boxing mualphonaah an ngai a, 'zahthlak' an tih thu an sawi.

Hetihrual hian boxing khawvela hming langsar tam tak chuan Miami khawpuia fight hi boxing tan a ṭha, tiin an sawi ve thung a, ngaihdan inang lo tam tak a awm - thil chiang tak erawh an inhnek ngei dawn e!

Boxing tan a ṭha!
Paul hian a YouTube channel-ah subscriber maktaduai 23 a nei a, world heavyweight champion Anthony Joshua-a'n YouTube lama subscriber a neih zat chu 730,000 a ni thung - social media aṭanga teh chuan Paul-a lar zawk.

Khawvel ram changkang zawk UK leh USA lam zirchianna aṭanga a lan danin YouTube hmang zingah ṭhalai an tam zawk a, hei vang hian YouTuber larin Mayweather-a hmachhawn tur hi boxing-in fans tam tak a neih belhna tura ngai an awm.

World heavyweight champion hlui David Haye chuan, "Mayweather leh Paul-a inhnek hian boxing tan eng thil pawi mah a thlen lo a, fans thar an siam zawk a ni," a ti a, world super-middleweight leh light-heavyweight champion hlui Badou Jack chuan, "Heng YouTuber ho hian fans tam tak an rawn hruai tel a, boxer ho hnenah social media leh marketing pawimawhzia an rawn pholang tel a ni," a ti ve bawk.

Money Mayweather
Hming lema 'Money' tih dah tel ngat kha a ni a, Mayweather hian sum hmuhna tur a nih chuan tih hreh a nei lo - American television series lar 'Dancing with the Stars' ah a inlan mai a, WWE lamah Big Show a hmachhawn tawh bawk!

UFC fighter Conor McGregor a hmachhawn tawh a, exhibition match-ah Japanese kickboxer a hmachhawn a, sum awmna lam apiangah American boxer lar hi a tlan a ni ber.

Mayweather hian he inhnek avang hian dollar maktaduai 100 tal chu a hlawh tura ngaih a ni a, professional fight-a hmachhawn awmchhuna tlawm Logan Paul hmachhawn a duh hi a awm lo hran lo.

Boxing tan a pawi?
Mayweather leh Paul inhnek tur hi boxing fans tam takin boxing zah lohnaah an ngai a, an ngainat em em infiamna chu fiamthu maiah a chhuak taah an ngai - thil lang chiang tak erawh boxing khawvel hian kum 44 mi Mayweather thlah a harsat a, he fighter hausa hian sum lakluh dan a hriat miau avangin an thlah thei lo.

Chutihrual chuan hei hi boxing khawvel thiam loh a ni ve tho - fighter-in an duh ang zawng boxer thlangin an hmachhawn a, an kalphung buai leh hriatthiam harsa tak hian fighter dang tan larna 'chance' a siam lo a, ṭhalai tam takin hming lar sa ni lo bawh an harsat phah bawk.

Professional boxing kalphung mumal lohzia pholangtu pakhat chu he inhnek tur hi a ni a, hmanni lawka Josh Taylor leh Jose Ramirez-ten light-welterweight-a world title pali an inchuh aia ngaihven a hlawh zawkte hlei hlei hian boxing hruaitute tan inenfiahna tur a chhawpsak.

Sum ngah ngah!
Sawiselna a tam a, mahse, Mayweather erawh a zam phah lo. American boxer hriat hlawh chuan, "Ka hming lemah pawh 'Money' tih ngat a ni a, rim taka hnathawh tih ai chuan fing taka hnathawh hi ka rin zawng a ni zawk.

"Hetiang ang thil awlsam, dan phal thlapa bank rawkna remchang ang maia hun duhawm a inchhawp chuan ka hnar phal lo a, ka tih ngei a ngai a ni," a ti a, "He naupang hian engti kawng mahin chance a nei lo," tiin a chak ngei tur thu a sawi bawk.

Mayweather vs Logan Paul hi television lamah pekchhuah a ni dawn lo a, fanmio.com lamah pay-per-view hmangin Thawhṭanni zing dar 5:30-ah a en theih dawn a, a man hi $49.99 (Rs. 3,649) a nih avangin sum insen nan chuan a uiawm deuh mai thei!