NBA Academy zirlai Mizo rawlthar Nanaua'n United States-ah basketball khel dawn

Zarkawt rawlthar Lalhnehpuia Chhakchhuak (Nanaua) chu NBA Academy kaltlangin United States-a zirna North Park University-ah a inziaklut a, college team tan a khel ang. Nanaua hma hian Mizoram Super League-a Zarkawt BCA a zawna vawi thum champion puitu captain Matthew Remtluanga Sailo (Pupua) chu United States-ah hian lehkha zir pahin a inkhel tawh bawk.

Thil awm dan chu
Nanaua khelhna tur North Park University hi Chicago-a awm a ni a, NCAA Division III hnuaia mi niin an conference awmna hi College Conference of Illinois & Wisconsin (CCIW) a ni.

Basketball a nih tawh chuan Mizo tam zawk chuan tan thil thar vek a ni a, a kip a kawia sawifiah a ṭul. Khawvela huapa basketball inelna lian ber chu NBA a ni a, player ṭha fuankhawmna a ni. NBA team-te hian hian National Collegiate Athletic Association (NCAA) aṭangin player an thlang ṭhin a, chutihrualin NCAA hnuaiah infiamna dang American football, football leh infiamna dangte pawh a awm vek tih hriat a ṭha.

A tawi zawng chuan NBA khel tur chuan lehkhathiam nih a ngai a, college luh ngei a ṭul. Mi zawng zawng tan college kal theih a ni lo a, sum sen a ngaih tam avangin infiamna lama mi bikte chuan scholarship hmangin zirna hi an chhunzawm ṭhin.

Chutihrualin basketball thiam eng ang pawh ni se zirna lam an ngaihthah a thiang lo, NCAA Division 1 hnuaia awm tur hian 2.3 GPA neih phak a ngai. Khawvel ram changkang bera ngaih United States-ah chuan infiamna leh zirna hi a kalkawp tlat.

Engtin zel?
NBA-in player an zawnna ber NCAA-ah hian division pathum a awm a, chungte chu Division I, Division II leh Division III te an ni. Division pathum zingah Division I hi a sang fal a, entu an tam bakah inelna level a sang a, NBA nen pawh a inthlau tam tawh lo.

NBA-in NCAA Division I aṭang hian player an thlang tlangpui a, Division II leh Division III aṭangin player an thlang meuh lo. NCAA bakah hian National Association of Intercollegiate Athletics (NAIA) a la awm bawk a, kalphung a hrang hret.

NAIA-ah hian division pahnih a awm a, NAIA Division I hi NCAA Division III nen intluktawk anga ngaih a ni.

Tu nge Nanaua?
Zarkawt rawlthar Nanaua zuk khelhna tur hi NCAA Division III a ni a, NBA nena sawizawm tur em chuan a kar a la zau hle. Chutihrualin basketball hmanga eizawng tura 'risk' la ngam Mizo rawlthar hian kawng dik a zawh chho mek a, hmabak êng tak a nei ta tih theih. Nanaua chauh hian risk a la lo a, a pa Aldrin Lallawmzuala leh a nu Lalrinsangi Nghinglova te tuipui vanga tun hun hi thleng a ni.

Nanaua hi a naupan tet aṭanga basketball ngaina a ni a, sulhnu pawh a nei ṭha. Gospel Centenary School leh St Paul Hr Sec School pawh inter school basketball-ah kum 2016 leh 2017 khan a champion pui tawh. MSL-ah pawh kum 15 mi lek niin Mission Vengthlang Hollows-ah a khel tawh a, Mizoram aiawhin kum bithliah inelnaah vawi nga a feh chhuah tawh bawk.

Kum 2018 khan Hawla Indoor Stadium-ah American coach Scott Fleming hoin Aizawlah NBA Academy-a awm tur trial an rawn nei a, Nanaua pawh hian trial hi a hmachhawn. Fleming hian trial aṭangin Nanaua hi a hria a, May 2-4, 2018-ah Greater Noida-ah trial neih tura koh a ni.

Trial tura koh mi 50 zingah mi pariat thlanchhuah an ni a, Nanaua hi a tel. Zarkawt rawlthar chuan, "NBA Academy-ah hian nasa takin hma ka sawn a, game-ah chauh ni loin rilru puthmang bakah ka taksa pawh a inthlak nasa. Ka rihna pawh 65 kg ni ṭhin kha 75 kg ka ni tawh a, ka san zawng pawh 5ft11in aṭangin 6ft2in ah a chho bawk," tiin a sawi.

Thlan zingah a tel
Covid-19 vangin kum dang angin NBA Academy-in trial an kalpui thei lo a, kum dang chu ni se India bakah hmun danga NBA academy China, Africa, Australia leh Mexico te, world select team pahnih red leh blue bakah The Skill Factory (TSF) te inelna an hmachhawn ang.

Amaherawhchu inelna an hmachhawn theih tak loh avangin US-a scout-ten Nanaua khel an hmu thei lo a, full scholarship an pe thei lo. Chutihrualin academy hian an chanchin kimchang chu US lamah an thawn thla a, court-a an chet dan piah lamah high school aṭanga a mark hmuh te pawh a tel vek.

Mizo rawlthar Nanaua bakah hian NBA Academy-a awm mi panga Harshwardhan Tomar (KEBA Preparatory School), Jagshaanbir Singh (Golden State Prep, Point Park University), Pranav Prince (First Love Christian Academy), Amaan Sandhu (First Love Christian Academy) leh Riyanshu Negi (DME Sports Academy) te chu thlan an ni.

Zarkawt rawlthar scholarship dawn hi partial scholarship a nih avangin engemaw chen chu an intum ve a ngai dawn. Nanaua chuan, "Mizo dangte tana entawn tur nih ka duh a, professional football-a S. Malsawmtluanga hnung zuitu tam tak an awm angin midang tana entawn tur nih ka duh. Chutihrual chuan zirna lamah pawh tha thlah ka tum lo a, infiammi tan chuan engpawh thleng thei a nih avangin backup plan neih a ngai a ni," tiin tum fel tak a neih thu a sawi.

Nanaua pa Aldrin Lallawmzuala chuan, "Kan fapa hi basketball kan tupui a, inkhel pawimawh chin hi chu kan ensak zel a ni ber. Tun dinhmun a thlen theih nana puitu zawng zawng chungah lawmthu ka sawi a, a bik takin Mizoram Basketball Association chungah lawmthu ka sawi," tiin Vanglaini a hrilh.

US-a inzir tawh 2
Zarkawt BCA captain Matthew Remtluanga Sailo (Pupua) chuan, "US-a basketball kalphung hi chu a mumal em em a, India nen chuan khaikhin rual a ni lo. Judson University tan kan khel a, NAIA Division I chauh kan ni nachungin India rama kan facility hian a pha lo ang. Keini pawh khan adidas aṭangin sponsor kan dawng," tiin Vanglaini a hrilh.

Pupua chuan sawi chhunzawmin, "Kalphung angin Scholarship dawng turin ka Highlight video kan thawn a, mahse kan khelhna level a hniam avangin a tirah thlan kan ni lo. A hmunah 'walk on' (tryout) hmangin hun ṭha kan nei leh a, heta ṭang hian mi pa pali zingah min thlang tling. Kan team-ah khan varsity leh junior varsity a awm a, team ṭha zawk nen hian kan training ho vek a mah se main squad ah ka khel pha lo hrim hrim.

"Basketball lama hma sawn zel theihna hmunah chuan ka awm a, amaherawhchu ka lo khelh ṭhinna level nen a inthlauh em avang leh ka rilru a lo la puitlin loh avangin, ka hun ṭha neih kha ka bawhpelh a ni. Semester khat ka khelh zawh hnuah, Full Sail University-ah Film B.Sc bawhzui turin ka transfer a. Hun rei tak competitive basketball ka chawlhsan," tiin US-a inelna san thu a sawi a, Nanaua hma hun a êng thu leh taimakna leh Pathian puihna nen level sang tak a thlen theih thu a sawi tel bawk.

Zarkawt BCA captain Pupua hi MSL player ṭha ber zinga mi a ni a, MSL4-ah khan Defensive Player of the Season a thlan a ni. Pupua bakah hian Ramhlun North tlangval Lalruatpuia'n US-ah hian tawnhriat a nei tawh. Ruatpuia erawh college basketball khel loin kum 2016 -2020 chhung khan IMG Academy leh Impact Academy-ah a awm.

MSL club Tuikual South leh Ramhlun Sporting Club tana khel tawh Ruatpuia chuan, "NCAA Division II leh Division III zawm theihna hun ṭha ka nei a, Division I erawh zirna chhunzawm theihna tur nei mah ila basketball team-ah ka tel pha lo. Amaherawhchu ngun takin ka ngaihtuah a, eizawnna tur khawpin ka ṭha tawkah ka ngai lo. Nanaua erawh duhsakna ka hlan a, hlawhtlinna a chan ngei ka beisei," tiin Vanglaini a hrilh.