Maradona thih hnua Argentina inlan vawi khatna

Argentina chuan an captain ropui leh World Cup chawi puitu Diego Maradona thih hnua an match hmasa ber an khel a, nimin zing khan World Cup qualifying-ah Chile nen 1-1 in an inhnehtawk.

Nikum November thla khan Maradona hi lungphuchawl in a thi a, a hnu lamah hri leng vangin friendly match khelh theih a ni lo, inkhelh tur pahnih chu an ṭhulh tawh. Tun ṭum hi world champion vawi hnih ni tawh inlan hmasak ber a ni.

Argentina tan captain Lionel Messi-a'n minute 24-naah penalty hmangin goal hmahruai a khung, an goal neih hi venghim tluan thei se chu table hmahruaitu an ni ang. Mahse, chawlhlawk hmain Alexis Sanchez-a'n a sut a, goal dang a lut zui lo.

Ram tan match 143 a khelh aṭanga goal 72 khungtu Messi chuan, "Diego awm loh hnua kan match hmasa ber a ni a, a khawhar thlak rualin ama tana khel kan nih avangin a ropui dangdai hle bawk," tiin a sawi.

Barcelona thiampuipa hian goal a khung bakah chakna goal a khung teuh thei hle. Freekick ṭha zeta a pet chu Chile goalkeeper Claudio Bravo-a'n a lo dansak a, a freekick hnuhnung zawkin bar a per hlauh bawk.

Argentina hian match nga an khelh aṭanga point 11 hmuin pahnihna dinhmun an luah, hmahruaitu Brazil an phak lohna chu point khat chauh a ni. Tukin zing dar 6:00 hian Brazil leh Ecuador an inkhel a, an result a zirin an inkar a la zau leh thei.

South America aṭangin World Cup khel tum ram 10 an inel a, an inkhelh kual hnuah a sang paliin World Cup an khel ang, pangana chuan playoff an khelh a ngai thung dawn a ni.