Alisson-a'n contract thar a ziak dawn

Liverpool chuan an goalkeeper Alisson Becker chu Anfield-ah hun rei zawk cham tura chelh an tum a, Brazil tana Copa America-a khelh zawh hunah contract thar an ziahpui dawn.

Kum 28 mi Alisson hian kum 2018 khan AS Roma aṭangin Liverpool hi pound maktaduai 66.8-in a zawm a, a hunlaia goalkeeper man to ber niin kar khatah £90,000 - £150,000 inkar a hlawh mek niin khawthlang media ṭhenkhat chuan an tarlang.

Reds tana Champions League leh Premier League nomawi chawi tawh Alisson hian contract thar a ziah chuan a hlawh a pung ngei ang tih a chiang a, Liverpool tan chuan ani ang keeper class sang chelh chhunzawm zel theih tur chu thu lawmawm a ni ang.

May thla khan Alisson hian Premier League match-a West Brom nen an inkhelh ṭumin chakna goal pawimawh a khung a, hun pek belha a goal tauh luh hi Liverpool goal of the season-ah thlan a ni.

Reds hian Alisson-a thachhang dawltu Adrian pawh a contract zo tawh dawn mah se kum khat dang an hnena cham tura contract thar ziahpui an tum a, he thuziak i chhiar meuh chuan an inrem tawh hial mai thei.

Kum 34 mi Adrian hi La Liga cub Real Betis-in lakluh tumin an hel hman a, season hman zawh takah khan Caoimhin Kelleher tluk loa Reds third choice a nih avangin a chhuah mai rinna pawh a lian hle.

Mahse, Adrian hian February khan Premier League-ah Sheffield United hmachhawnin goal a chhuah lo a, Jurgen Klopp-a'n tawnhriat a neih ṭhat bawk avangin an hnena cham tura chelh a duh.

Hetihlai hian kum 22 mi Kelleher erawh loan-a chhuahtir tum a ni thung a, Union Berlin-a loan-a khel mek Loris Karius chuan Anfield-ah kum 2022 thleng contract nei mah se Stuttgart a zawm mai a rinawm viau bawk.

Liverpool hian RB Leipzig aṭangin centre back Ibrahima Konate chu pound maktaduai 35-in an lalut fel tawh a, kum 22 mi French defender bakah hian RB Salzburg striker Patson Daka lalut thei dinhmunah an ding mek niin khawthlang media-te chuan an tarlang.

Kum 22 mi striker hian season hman zawh takah khan Austrian Bundesliga club Salzburg tan hian match 41 khelin goal 34 ngawt a khung a, Anfield hi a pan a nih ngat chuan Liverpool tlarhma chu an ngaihtuahawm lo khawp ang.

Premier League-a tlangnel tawh sa, Leeds United winger Raphinha chu Liverpool nen hian sawizawm an ni bawk a, season hman zawh taka match 38-a khelha goal riat khung a, assist vawi 11 nei thei Raphinha hi an lalut duh a nih erawh chuan pound maktaduai 32 tal sen an inhuam a ṭul dawn a ni.

Liverpool hian transfer-a mit an len piahlamah an neihsa player ṭhate chelh dan tur chu thupui berah an nei mek a, Andy Robertson, Trent Alexander-Arnold, Mohamed Salah leh Fabinho-te pawh contract thar ziahpui an tum dawn niin khawthlang media-te chuan an tarlang.