Qatar laka tlawm India beiseina a la thi lo
Ningani zan khan India chuan World Cup qualifier-ah Qatar an hmachhawn a, player kim loa hun tam zawk hmang chungin Asian champion lakah hian 1-0 in an tlawm.
Inkhel ṭan aṭanga minute 17-na lekah Rahul Bheke chuan a yellow card pahnihna a hmuh avangin hnawhchhuah a ni a, player kim pawha rin hlawh lo zawk India dinhmun a derthawng sawt.
Minute 33-naah Qatar lamin goal an khung ta nge nge a, AFC Asian Cup 2019-a Team of the tournament-a lang phak Abdulaziz Hatem chuan Gurpreet Singh Sandhu man rual lohin goal hmahruai a khung.
Qatar-in goal an khung laia rilrua awm chu mualneitu team hian eng zat tak khung belh ang maw, tih chu a ni a, mahse, India tan si ban nghaktu Gurpreet-a che sual duh lo a, mualpho lutuk loin India-in minute 90 an hmang tluan thei hram.
Blue Tigers tan Lalengmawia (Apuia) chuan inkhel bul ṭan lo mah se bench aṭanga luhtir a ni a, Vaivakawn rawlthar hian minute 68-na aṭanga khelmuala hun hmang ve ṭanin a khel ṭha thawkhat viau.
NorthEast United midfielder Apuia chuan, "Result chhia a ni lem lo a, kan khelh dan enin kan chhuah tlem pawh a awm tho. Ka luh kha chuan player pakhatin kan kim lo tawh a, tih theih a tam tawh lo a, ka khelh danah ka lawm thawkhat viau e," tiin Vanglaini a hrilh.
India hi World Cup khel turin an tling thei tawh lo chiang sa a, chutihrual chuan AFC Asian Cup 2023 qualification third round an la inpetkai thei thung - chumi tur chuan an hmabak match hnihah chak a ṭul ang.
Blue Tigers hian June 7 zanah Bangladesh an hmachhawn ang a, June 15 zanah Afghanistan nen an inkhel leh bawk ang - Bangladesh leh Afghanistan hi Ningani zanah vek inlanin 1-1 in an inhnehtawk a, Afghanistan team-ah hian Aizawl FC defender hlui Masih Saighani a tel a, kum 34 mi centre back hi minute 63-naah luhtir a ni.
German division hniam lam aṭanga a career ṭantu Saighani hian season hman zawh takah khan Bangladesh club ṭha Abahani Limited Dhaka tan a khel.
India hi an hmabak match hnihah hian an chak ve ve chuan team pahnih hian Blue Tigers hi an umpha thei tawh dawn lo.
Group E-a pathumna hian Asian Cup 2023 qualifier chu third round aṭanga an khelh ṭan dawn avangin team pathum hian beisei an la nei ve vek.
Palina nih pawhin, group pariat aṭanga palina ti ṭha pali zinga tel phak chuan Asian Cup qualifier hi third round aṭangin a khelh ṭan theih dawn a, hei hi an phak lo a nih chuan table-a pangana nen Asian Cup 2023 khel tur chuan qualification playoff aṭanga bul an ṭan a ngai dawn a ni.
AFC World Cup qualifier-ah hian group A - H ah team 40 an tel a, group pakhatah panga zel an awm - group tina a chung bera awmte leh pahnihna tiṭha zual palite chu World Cup qualifier third round-ah an lut ang a, Asian Cup khel turin an tling zui bawk.
Group E-a hmahruaitu Qatar chuan World Cup an thlen dawn avangin an tling chiang sa a, group hmahruaitu ni chunga third round an lut a nih chuan an aiah pahnihna ti ṭha zinga pangana kha third round-ah an lut dawn a ni.
Third round-ah hian team paruk ve ve awmin group A & B-ah ṭhen an ni ang a, group pahniha a sang pahnih ve ve chu World Cup khel turin an tling ang a, pathumna pahnih chuan playoff an khel ang.
Playoff-ah hian inter-confederation playoff-a inlan tur an zawng leh ang a, a chak zawk hian inter-confederation playoff-ah khawmualpui dang aṭangin team pakhat an tum leh ang a, hnehna an chan chuan World Cup an khel thei dawn a ni.
