Muangchangin hma kan sawn - Marquez

Hliam vangin season hmasa a hmang thei lo a, kuminah lo kir mah se Marc Marquez-a'n a tum leh duh angin inelna a la hmachhawn thei lo. Spanish rider hian team dang elphak tura hmasawn an mamawh thu a sawi.

Marquez chuan, "Nikum khan bike lamah harsatna kan nei tih ka hria, mahse chakpui tham chu a ni. Cal Crutchlow kha a tlan ṭha em em a, mahse a vannei tawk lo, vanneih ṭum ni se chuan champion turin a ṭha tawk.

"Kuminah hmasawnna hmuh tur a awm, chutih rualin kan elpui team dangin nasa takin hma an sawn ve bawk a, chuvangin keini lam kan ṭan mar a ngai hle. Vawi leh khata hmasawn thut ai chuan zawimuanga insiamṭhat zel hi a pawimawh," a ti.

A lo kir leh chinah Marquez-a'n hnehna a la chang lo a, atan dawhsan (podium) lawn phak ringawt pawh thil awlsam a ni lo. Chutih rualin MotoGP vawi ruk champion tawh hi a la beidawng lo.

Pathianni tlai dar 4:30 hian Circuit de Barcelona-Catalunya-ah Catalan GP an tlan dawn. Inelna neihna tur hmun hi kum dangah chuan Marquez tan hmun ṭha ni ṭhin, kuminah pawh harhtharna chan nan hman a tum ang.