Barty a inkhel zo thei lo

French Open khelh laiah hmeichhe world number 1 Ashleigh Barty chu hliam vangin a inhnukdawk. Seeded pakhatna hi Ningani tlai khan Magda Linette nen an inkhel a, 6-1, 2-2 in a hnufual laiin a malpui vei lam hliam vangin a inkhel zo thei lo.

Kum 2019 French Open champion Barty chuan, "Ka dinhmun kha a tir aṭangin a ṭha tawk lo, mahse a tawp thlenga inelna hmachhawn ka duh avangin ka theihtawpa rei chu ka inkhel lui, set hnihnaah erawh kha chuan tihngaihna a awm ta lo a ni," tiin a sawi.

Australian nula hi a match hmasa zawkah pawh a hliam vang hian enkawl lailawk a ngai hial. Hliam nei chungin hnehna a chang a, a match hnihnaah erawh a khel tluan thei ta lo.

Inkhel dangah Karolina Pliskova chu Sloane Stephens lakah set la loin a tlawm a, inelna neih laiah ranking sang zual 10 chin aṭangin player panga chiah dam an awm tawh.

Naomi Osaka a inhnukdawk tawh bawk a, tun dinhmunah chuan seeded pathumna Aryna Sabalenka chu ranking sang ber a ni ta. Seeded pakuana Pliskova hi 2018 finalist Stephens lakah 7-5, 6-1 in a chak lo a ni.

Player langsar an chak lo a, ṭhenkhat an inhnukdawk bawk. Hetiang karah hian champion lai Iga Swiatek erawh a buai ve lo, Polish tleirawl duhawm hian Rebecca Peterson chu 6-1, 6-1 a sawpin third round a lut.

Tleirawl beiseiawm tak Coco Gauff pawhin hnehna a la chang, Amercian player hian Chinese nula Wang Qiang chu 6-3, 7-6 (7-1) a henhin, a vawi khat nan Paris khawpuia inelna lianah second round a paltlang.