Koeman a cham dawn

Barcelona president Joan Laporta chuan an coach Ronald Koeman chu season thar atan an chhawr chhunzawm dawn tih a sawi a, media ṭhenkhatin chhuak tur anga an tarlan chu a dik lo tih a nemnghet.

Dutch manager Koeman hian season hmasa khan Catalan club hi a zawm, beisei angin a hlawhtling nghal lem lo. Copa del Rey chu chawi mah se La Liga-ah pathumna an ni a, point 79 an hmuh chu 2008 hnu lama point an hmuh tlem ber ṭum a ni hial.

Laporta chuan, "Ngun takin kan inbia a, thil hrang hrang uluk taka ngaihtuah a nih hnuah Barca tan Ronald Koeman a cham hi a ṭha. Season hmasa lama kan hun hman dan thlirkir chungin hmasawn ngaihna lai kan ngaihtuah ang," a ti.

Barcelona hian an squad an thuam chak chho mek a, captain Lionel Messi pawh hun rei zawk atan contract ziahpui an tum. Player bakah thluak hmang turin Jordi Cruyff pawh an lalut dawn.

Barca legend Johan Cruyff-a fapa Jordi hian Chinese Super League club Shenzhen FC chhuahsanin Catalan club hi a zawm dawn a, team enkawl hna thawk dawn lo mah se thluak hmangtu pawl zingah an tel ang.