All England-ah Sindhu leh Saina

Badminton World Federation hnuaia season khat chhunga Super 1000 hmasa ber All England Championship chu zanin aṭangin khelh ṭan a ni dawn a, inelna ngaihhlutah hian PV Sindhu leh Saina Nehwal an inlan ang.

Rio Olympic silver medalist Sindhu-i'n a match hmasa berah American player Zhang Beiwen a hmachhawn dawn a, world number 1 hlui Saina chuan Japanese nula Akane Yamaguchi a bi tum ve thung dawn a ni. Coronavirus vangin player inlan tur inhnuk-dawk an awm nual a, chutihrualin champion tura rinkai leh a ṭha zual erawh an kim tura ngaih a ni. Hri leng vang hian badminton inelna ṭhenkhat sawn a nih bakah ṭhulh a awm nual bawk. Olympic neih kum a ni a, inelna hrang hrang hi Olympic Qualifier a nih nghal zel avangin player ranking hniam deuh, inelna liana tel phak duh si tan chuan tournament khelh tam a pawimawh. All England hi ranking point 12,000 zet hmuh theihna a ni.