Euro khel lo tur Arnold

Liverpool right back Trent Alexander-Arnold-a'n footballer tam tak tawn duh loh thil a tawng a, major tournament khelh hmaa a inhliam avangin Euro 2020 a khel ve dawn lo.

England defender hi Austria nen Nilaini zana friendly match an khelh ṭumin a inhliam a, a hliam hi endik a nih hnuah kar ruk tal a chawlh a ngai dawn tih a chian tak avangin Liverpool lamah inenkawl turin a kir dawn a ni.

Three Lions manager Gareth Southgate chuan Arnold-a hmun ruak luah tur hi puan lawk a tum lo a, Pathianni zan dar 9:30-ah Euro inbuatsaih nan Romania an hmachhawn leh phawt ang a, hemi zawhah hian Arnold hmun ruaka awm tur player hi a ko chauh ang.

Kum 22 mi Arnold hian squad-a telh a nih khan, "Nangmah i inrintawkna hloh ngai lo la, ringhleltu che chu ngawihtir zawk ang che," tiin England jersey nen amah sawiseltute a chhanglet a, a tawpah erawh vanduai vangin a khelh châk Euro a khel dawn ta chuang lo.

England hian Arnold chan mah se right back-a khel turin Atletico Madrid tana league nomawi chawitu Kieran Trippier, Premier League-a Manchester City champion puitu Kyle Walker leh Chelsea tana Champions League nomawi chawi hlim Reece James-te an nei a, an hausakna lai tak a ni.

Arnold a inhliam takah chuan Southgate hian defender bawk ai chuan tlarhma lamah a mit a len zawkin a rinawm a, West Ham tana season duhawm tak hmangtu Jesse Lingard leh Southampton captain James Ward-Prowse-ah hian a tu emaw zawk zawk a koin a rinawm.

England hian June 13 zanah Euro 2020 match hmasa ber chu an khel dawn a, Wembley Stadium-ah Croatia an hmachhawn ang. Three Lions hi group D-ah an awm a, Croatia zawhah Scotland (June 18) leh Czech Republic (June 23) te an hmachhawn leh dawn a ni.