Conte leh Spurs inbiakna a tlawlh
Tottenham Hotspur leh Antonio Conte-ten inbiakna kalpui thui hman viau mah se an inbiakna hi tihtawp a nih thu khawthlang media-te chuan an tarlang a, Italian coach hian London club hi a enkawl a rinawm ta chiah lo.
Spurs hian a tirah Julian Nagelsmann beisei mah se German coach hian Bayern Munich a zawmsan a, Leicester City Brendan Rodgers-a'n King Power Stadium chhuahsan tumna a nei lo bawk.
London club hian an ban hnu Mauricio Pochettino thlengin an rim leh a, mahse, Paris St-Germain-in chhuahtir tumna an neih loh avangin Serie A lama Inter Milan a champion pui hnu lawka chhuahsantu Conte lam an hawi.
Italian media lamin an tarlan dan chuan Conte hian transfer budget a dawn tur zat chu a duh khawp lo a, hei vang hian Spurs nen an inrem thei lo - Inter a chhuahsan chhan pawh a beisei ang zat sum bazarna tura an pek theih loh vang tho a ni.
Kum 51 mi Conte hian transfer bazar-ah sum a hmang na ṭhin a, player lar sa a lei tlangpui ṭhin - hetihlai hian Spurs erawh sum seng hnem loa youth development lama innghat an ni a, Conte nen an inrem thei ta lo.
Khawthlang media-ten an tarlan dan chuan Conte hian tuna Spurs squad awm sa nen chuan Manchester City, Manchester United, Liverpool leh Chelsea-te nena inel a harsa turah a ngai a, hetihlai hian an thiampuipa Harry Kane chuan chhuah a duh thu a lo sawi ve mek bawk.
Kane hian Conte vangin Spurs-a cham lo thlang ta tehreng pawh ni se Son Heung-min tih loh chu Kane-te nen level khata dah an rem lo a, sum hmang na ṭhin Conte-a thutlukna hi dem theih a ni lo.
European football transfer expert Fabrizio Romano chuan, "Spurs-in an inrem lohna siamrem dan ngaihtuah mah se Conte hian a ngaihdan a thlak rih lo a, Spurs director of football atana Fabio Paratici lakluh pawhin Conte ngaihdan a tidanglam lo ang," a ti.
Fabio Paratici hi Juventus sporting director ṭhin a ni a, kum 48 mi football administrator lar hian Italian club hi tun hnai lawkah a chhuahsan a, Spurs hi a zawm lehnghal dawn niin khawthlang media-te chuan an tarlang a ni.