Mayweather vs Paul: A hun a thleng ta

Khawvel ngaihven inhnek chu vawiinah a thleng dawn ta a, tukin zing dar 5:30 bawr vel hian boxer ropui ber ang hiala mi tam takin an ngaih Floyd Mayweather leh YouTube superstar Logan Paul-te an inhnek dawn.

Fighter pahnih hi an inhnek hmaa an inbukna hnuhnung berah an inthlau hle - Mayweather hi kg 70-a rit a nih laiin Logan Paul hi kg 85-a rit a ni thung a, fighter pahnih inbuk rih hleihna hi kg 15 ngawt a tling.

Mahse, Mayweather a zam phah lo. Weight division pangaa world champion lo ni tawh boxer chuan, "Fight tam tak ka lo hmachhawn tawh a, hnehna chang tura tih ngai chu ka hria. Style hrang hrang, ka hmachhawn theih ang chu ka hmachhawn kim tawh.

"San zawk avang ringawtin a chak theih loh a, rih zawk avangin kan chak dawn tihna a ni lo. Hnehna chang tura a pawimawh ber chu fight thiam a ni a, chu chu ka thiam a ni," a ti a, "Top level-ah kum 25 ka awm tawh a, hetiang ang fight-a hnehna chang tura tih ngai chu ka hria," tiin a sawi zui.

YouTube aṭanga hriat hlawh Logan Paul a zam bik lo a, Mayweather a hneh theih a inring tlat! Paul chuan, "Floyd hi he fight hmachhawn tur hian a inpeih lo a, enge beisei tur pawh a hrethiam lo.

"Ka tan chuan fight satliah ve mai a ni a, ani tan erawh engkim innghahna a ni. Kei chuan nuam ti taka khel turin ring chhung ka lut ang a, ani chuan a hmingṭhat tawhna zawng zawng hloh hlau tak chungin ring chhung a lut thung ang," a ti a, pressure a neih ve loh thu a sawi.

Paul hian a duhtawk mai lo - "Thil nihphung thlak danglamin khawvela boxer ropui ber chu ka tukdawl dawn a ni," a ti zui a, hnehna chan ngei a tum.

Miami khawpuia exhibition fight avang hian Mayweather hian dollar maktaduai 10 chu a hlawh dawn chiang a,

dollar maktaduai 30-a hlawh der tawh thu a sawi bawk - pay-per-view share hi 50% a chan dawn avangin dollar maktaduai 100 chu hlawh tura ngaih a ni.

Paul hian fight avang ngawr ngawra a hlawh tur hi $250,000 bawr vel nia sawi a ni a, mahse, PPV aṭanga 10% share a neih avangin dollar maktaduai 20 tal chu hlawh tura ngaih a ni ve bawk.

Hard Rock Stadium-a inhnek hi television lamah en theih tura pekchhuah a ni dawn lo a, showtime.com leh Fanmino.com lamah $49.99 (Rs. 3,656) sengin a en theih ang.