Tevez-a'n Boca a chhuahsan, a chawl dawn?

Football khawvela striker hmuhnawm ber pawl ni ṭhin Carlos Tevez chuan a khelh mekna Boca Juniors a chhuahsan thu a puang a, hetihrual hian a chawlh dawn leh dawn loh erawh a la sawi chiang thei lo thung.

Tevez chuan, "Argentina a ka football career chu a tawp ta a, he ramah hian Boca ni lo club dang tana ka khelh ngai loh tur thu ka lo sawi fo tawh a ni," a ti a, football a chawlhsan dawn lo a nih chuan Argentina pawn lamah a kal leh a ngai dawn tihna a ni.

Manchester United striker hlui chuan, "Vawiinah chuan, 'Ka chawl tawh e,' tiin ka sawi mai thei a, mahse, thla thum hnuah inkhelh leh châk ta ila, engtin nge ni ang?" tiin inkhelh chawlhsan puan mai a la ngam loh chhan a sawi.

Tevez hian Boca Juniors-ah hian thla ruk dang khel turin contract a la nei a, mahse, he contract hi inhriatthiam tawnnain an titawp a ni - Argentine striker hian a contract tihtawp chhan ber chu a pa thihna vang a nih thu a sawi lang.

February thla khan Tevez-a pa Segundo Tevez chu kum 58 mi niin Covid-19 vangin a thi a, Manchester City tan pawha lo khel tawh striker hian mumal taka a pa sunna hun pawh a nei lo chu hrehawm a tih thu a sawi a ni.

Argentina tan vawi 76 inlana goal 13 khungtu striker chuan, "Boca tana kan khelh chuan 100% pek a ngai a, theihna zawng zawng hlan tura beisei kan ni. Mahse, tun dinhmunah chuan chutiang ti theiah chuan ka ding si lo a ni.

"Mumal taka ka pa sunna hun pawh ka nei thei lo a, tunah inkhelh a ngai leh tawh bawk si, chu chu Boca-in min beisei chu a ni," a ti a, a pa pawh thlah ṭha thei loa inkhelh harsa a tih thu a sawi lai hian a mittui a tla hial.

Tevez hian Boca Juniors youth team aṭanga inzir chhuakin 2001-02 season khan a professional zinkawng a zawh ṭan a, inelna hrang hrangah match 110 khelin goal 38 a khungsak a, kum 2005 khan Brazilian club ṭha Corinthians a zawm san.

Brazil Serie A-ah season hnih khela hming a chher hnuin West Ham a pan a, London club tana hming a chher hnuin Manchester United, Manchester City leh Juventus tan a khel leh a, European club lian tak tak nen sawi zawm ni mah se kum 2015 khan Boca lamah a kir zui.

Boca tan hian kum 2017 thleng a khel leh a, hemi kumah hian Chinese Super League club Shanghai Shenhua a pan - China ramah hian season khatah dollar maktaduai 41-a hlawh a, khawvela footballer hlawh hnem berah ngaih a ni.

CSL-ah Tevez-a'n rilru a pe tawk lo a, an coach Wu Jingui phei chuan Argentine striker chu inkhel tlak lo khawpa a rih thu a sawi a, Tevez hian China-a a hun hman chu, "Chawlh ang mai a ni," tiin a sawi zui!

China-ah kum khat chiah hun a hman hnuin kum 2018 khan a hmangaih Boca-ah bawk hian a kir leh a, Argentine club tan hian nomawi chawi theih ang zawng zawng chu a chawi kim a ni.

"Ka thisen rawng chu a eng leh a pawl a ni," tia Boca-a hmangaihzia sawitu Tevez hian West Ham tih loh a kalna club-ah chuan nomawi a chawi zel a, football mangṭha hlen ta pawh ni se a awm lo hran lo ang.

Kum 37 mi striker hian a career chhung zawngin club hrang hrang tan inelna hrang hrangah match 599-a khel a, goal 234 khungsakin assist vawi 108-a nei bawk.

Tevez & nomawi

Boca Juniors
Primera División: 2003, 2015, 2016–17, 2017–18, 2019–20
Copa Libertadores: 2003
Copa Sudamericana: 2004
Intercontinental Cup: 2003
Copa Argentina: 2014–15
Supercopa Argentina: 2018
Copa de la Liga Profesional: 2020

Corinthians
Campeonato Brasileiro Série A: 2005

Manchester United
Premier League: 2007–08, 2008–09
Football League Cup: 2008–09
FA Community Shield: 2008
UEFA Champions League: 2007–08
FIFA Club World Cup: 2008

Manchester City
Premier League: 2011–12
FA Cup: 2010–11
FA Community Shield: 2012

Juventus
Serie A: 2013–14, 2014–15
Coppa Italia: 2014–15
Supercoppa Italiana: 2013

Shanghai Shenhua
Chinese FA Cup: 2017

Argentina
Olympic Gold Medal: 2004
CONMEBOL Pre-
Olympic Tournament: 2004
South American U-20
Championship: 2003