India vs Bangladesh: Khelh chhan a la awm

Qatar-a World Cup qualifier khela thang mek India-in World Cup khelh beiseina nei tawh lo sa chungin Qatar an pan a, an match hmasa berah Covid-19 vanga group E inkhel zawng zawng thlengtu Qatar chu 1-0 in an hneh lo.

Mahse, India hian an hmabak match hniha Bangladesh leh Afghanistan an hneh chuan AFC Asian Cup 2023 qualifier chu third round aṭangin an khel dawn a, hei ringawt pawh hi thlakhlelh tham a nih avangin India tan hmabak match hniha chak a pawimawh.

Blue Tigers hian zanin dar 7:30-ah Bangladesh an hmachhawn dawn a, an chak zo lo a nih ngat chuan Sunil Chhetri leh a ṭhiante tan mualphona tawp khawk a ni dawn.

Mizo telna
India squad-ah Mizo pahnih an awm a, NorthEast United tana season duhawm tak hmangtu Lalengmawia (Apuia) leh Chennaiyin FC forward Lallianzuala Chhangte te chu Blue Tigers tana inlan tura koh zingah tel.

Qatar lakah erawh player pahnihin bul an ṭan lo ve ve a, Apuia hi bench aṭanga luhtir ni mah se Rahul Bheke-a'n red card a hmuh avangin inkhela danglamna thlen a harsa tawh.

Asian champion lakah Lianzuala a inlan lo a, fans tam tak an hnual - zaninah Igor Stimac-a'n eng ang takin nge squad a rawn rem dawn hriat a châkawm hle.

Bangladesh chu
Zanina India hmachhawn tur Bangladesh hi Jamie Day enkawlna hnuaiah an khel a, Arsenal aṭanga inzir chhuak midfielder ṭhin hi kum 41 lek ni mah se English division hniam lamah team enkawl a neih nual tawh avangin a kum naupan anga en chi a ni lo.

Bournemouth tan pawha lo khel tawh Day hian tawnhriat ṭha aiin ṭhangthar thaza a thlang a, Bangladesh squad-a upa ber chu kum 31 mi Jamal Bhuyan a ni.

Danish club lar F.C. Copenhagen aṭanga inzir chhuak Bhuyan hian I League season hman zawh takah khan Mohammedan SC tan a khel a, ISL club-te nen sawizawm a ni mek - India tan chak tur chuan ani hi ven bik ngai tur player a ni.

Chhetri telna
India-in Chhetri an nei a, Bengaluru striker a awm chuan Indian player-te thla a muang ṭhin - kum 36 mi striker hian India tan match 116 a khelhah goal 72 a khung thei.

Chhetri hian ram tana la inlan mek player zingah Cristiano Ronaldo (103 goals) leh UAE forward Ali Mabkhout (73) te chu international football-a goal khung hnem lama a phak loh awmchhun an ni.

Gurpreet Singh Sandhu theihnghilh a thiang lo a, Punjabi keeper hi Qatar nena an inkhelh zawhah khan Qatar defender ṭha Abdelkarim Hassan chuan Premier League khel tura a ṭhat tawk thu a hrilh - GSS hi a inlan chuan Bangladesh striker tan hna a hautak sawt ang.

Beiseina
AFC World Cup qualification-ah team 40 an awm a, group A-H ah ṭhen hran niin group pakhatah team panga zel an awm - group tina a chung bera awmte leh pahnihna tiṭha zual palite chu World Cup qualifier third round-ah an lut ang a, Asian Cup khel turin an tling bawk ang.

Group tina pathumnate hian Asian Cup 2023 qualifier third round an khel dawn thung a, hei hi India-in beisei an la neihna chu a ni - Bangladesh leh Afghanistan an hneh chuan Asian Cup qualifier hi third round aṭangin an khel dawn.

India hian Bangladesh hi an ngam lo a nih chuan kawng dang a la awm cheu - Afghanistan an hneh a, palina an nih chuan group pariat aṭanga palina ti ṭha pali zingah telna 'chance' a awm ang a, hemi kaltlang hian Asian Cup qualifier hi third round aṭangin an khel thei. A tawi zawnga sawi chuan India tan chak lohin Asian Cup qualifier third round luh lohna chance a sang zawk a, zaninah chak a ngai.