Wenger-a'n Germany a ring lo

Germany-in zanin dar 12:15 hian Latvia an mikhual dawn a, Euro 2020 hmaa friendly match hnuhnung ber an ni tawh ang. Joachim Low-a hote hian kumin inelnaa match hmasa berah Euro 2016 semifinal-a an hneh loh France an hmachhawn nghal dawn a, champion lai Portugal leh Hungary te an group-ah an awm bawk.

Arsenal manager hlui Arsene Wenger chuan, "Ka ngaihdan tlang taka sawi chuan Germany hi ka beisei sang lo. Tun hma angin an ngelnghet lo a, inrintawkna an hloh bawk," tiin a sawi.

French manager sawi ang hian Low-a hote hian Euro 2018 hnuah result ṭha neih an harsat a, an match hnuhnung berah Denmark nen an inhnehtawk a, hemi hma hian World Cup qualifier-ah North Macedonia lakah 2-1 in an chak lo bawk.

Chutihrualin Low-a'n result ṭha duh vangin a thutlukna a sut a, Thomas Muller leh Mats Hummels te ko let lehin team chhung boruak thlak danglam a tum mek. Germany tan zanina Latvia nena an inkhel result hi a pawimawh dawn a, inrintawkna neih letna tur khawpa an khel ṭha a nih ngat chuan Euro 2020-a team ṭha ber zingah an tel pha ang.