Arsenal hellai Villa-in chhuhsak

Aston Villa chuan Arsenal lei tum Emiliano Buendia an la dawn, Argentine midfielder manah hian pound makatduai 30 an thehchhuak phal a, inremna an nei tawh - a man hi pound maktaduai 40 thlenga pung chho thei tur a ni ang.

Kum 24 mi Buendia hi season liam ta khan Norwich City player of the season a ni a, league match 36 khelin a team hi Championship nomawi chawi puiin Premier League a inhlankaipui hial.

Hmabak a nei engin khelmual chhunga a chevel a hmuhnawm a, club lian ṭhenkhat pawhin an ngaihven hle. Arsenal chuan lak tumin an lo thlithlai fo tawh a, mahse a tawpah Villa zawkin an chang.

Kum 2019-20 season khan Villa hi EPL-ah an him hram hram, season liamtaah erawh point 55 hmuin 11-na an ni a, season tharah chuan nasa lehzual zawka hmasawn an tum tih a lang chiang.

Villa manager Dean Smith chuan, "Premier League club ṭha zinga mi nih leh kan tum. Nipui bazar hmasaah khan Ollie Watkins, Emi Martinez, Bertrand Traore leh Matt Cash te kan lei, tun ṭumah pawh inthuamṭhat zual theih a beisei awm," tiin a lo sawi tawh, player dang pawh an la melh dawn.