NBA Playoff Harden hliam mah se Nets an chak

NBA champion nih tum Brooklyn Nets chuan Inrinni zing khan conference semifinal an khel ṭan a, an player pawimawh James harden inhliam mah se Milwaukee Bucks chu 115-107 in an hneh.

Inkhel ṭan aṭanga minute khat pawh a liam hmain Harden hi malpui na vanga lak chhuah a ngai. Harden awm lo mahse Kevin Durant-a'n point 29 a nei a, point 25 neitu Kyrie Irving an kawl bawk avangin buaina tur a awm lo.

New York khawpuia inkhelah Milwaukee tan an thiampuipa Giannis Antetokounmpo chuan point 34 a nei thei, amaherawhchu nidang angin a kut a kal tawk lo! A hun ṭha neih a khawhral hnem hle.

Nets coach Steve Nash chuan, "Season kal laiah hiam hliam vangin kan buai ngun hle a, tuna Harden inhliam leh hi pawi ka ti takzet. Kan ṭhat theih dan bera playoff khelh theih kha thil chakawm tak a ni, a lo kir thuai ka beisei," tiin a sawi.

June 8, Thawhlehni zing dar 5:00-ah game 2 an khel leh ang, NBA playoff chin hi best of seven series hmanga chak zawk zawn a ni a, match hmasa lama chak lo Bucks tan pawh tlang turin beiseina a la awm tihna a ni.