Italy a zawnin match riat an chak

Roberto Mancini kaihhruai Italy chuan Euro Championship hmaa friendly match vawi hnih an khelhah chiang takin an chak ve ve. Azzuri hian May thla tawp khan San Marino 7-0 in an sawp a, Zirtawpni zan khan Czech Republic 4-0 in an hneh.

Renato Dall'Ara-a inkhelah Italy tan Ciro Immobile, Nico Barella, Lorenzo Insigne leh Domenico Berardi ten goal khat ṭheuh an khung. Azzuri-in Mancini hnuaiah hartharna an chang a, a zawnin match riat chhung an chak tawh a, goal khatmah an chhuah lo.

Italy an ṭha
Roberto Mancini-a'n Czech an hmachhawn ṭum hian player a thlak hlawk a, San Marino 7-0 an sawp ṭuma bul ṭantuten bul an ṭan nawn lo.

Player khelh dan aṭanga thlirin Czech Republic hmachhawn tute hi Euro 2020-ah pawh rinrawl tur niin an lang. Goalkeeper-ah Gianluigi Donnarumma, defence laiah Giorgio Chiellini leh Leonardo Bonucci te an inkawp a, mual sirah Alessandro Florenzi leh Leonardo Spinazzola te an awm.

Midfield-ah Jorginho, Nicolò Barella leh Manuel Locatelli te an awm a, tlarhmaah Lorenzo Insigne, Ciro Immobile leh Domenico Berardi te an awm. Azzuri match hnihah hian PSG midfielder Marco Verratti a te lo ve ve a, Mancini chuan Turkey nena Euro 2020 match hmasa berah chhawr theih a inbeisei thu a sawi thung.

An thiam e
Italy passing a dak ṭha a, an game pawh a nghet ṭha. Ciro Immobile leh Nicolo Barella ten first half-ah goal an khung a, Czech player vanga goal ve ve ni bawk mah se hmahruai hi an phu hrim hrim.

Napoli forward Insigne tan ni bik a ni a, Czech an hmachhawn ni hi a kum 30 piancham a ni. Insigne hian minute 66-naah Immobile siamsak chu goal-ah a chantir a, Napoli forward hian minute 73-naah Domenico Berardi goal khung tur a siamsak leh bawk.

Mancini 'magic'
FIFA World Cup-a vawi li ngawt champion tawh Italy hi football khelh thiam ram ni mah se World Cup 2018-ah an tel pha lo. Azzuri-in hartharna beiseiin May 14, 2018 khan coach atan Robert Mancini an lalut.

Mancini hnuaiah Italy-in insiamṭha turin hun an duh a, kum 2018-ah match kua khelin vawi thum an chak a, vawi hnih chak loin vawi li an inhnehtawk.

Manchester City manager hlui Mancini hnuaiah Italy-in thiamna an nei leh ta a, kum 2019 chhung khan match 10 khelin an chak vek. Kum 2020-ah pawh Italy-in chak loh an la nei a, match riat an khelhah vawi nga an chak.

Kuminah Italy hian match nga na khel tawh a, an la chak vek bawk. World Cup hnuhnung bera inlan lo Italy kha Euro 2020-ah meuh chuan champion tura rinkai an ni leh tawh a, player mala langsar vut awm lo mah se team angin an ṭha.

Engtin zel?
Italy hi group A-ah Switzerland, Turkey leh Wales te nen an awm ho dawn. Azzuri hmachhawn hmasak ber tur Turkey hian friendly match hnuhnung berah Moldova 2-0 in an hneh a, hemi hma hian Guinea nen goal awm loin an inhnehtawk.

Euro 2016 semifinalist Wales tan pawh vanneihna tel lo chuan a sang palia tel nawn a theih lo ang. Wales hian France 3-0 in an hneh lo a, an match hnuhnung berah Albania nen goal awm loin an inhnehtawk.

Switzerland hi ram langsar tak ni lo mah se an tawh a khirh dawn. Granit Xhaka captain-na hnuaia khel team hian USA 2-1 a an hneh hnuah Liechtenstein 7-0 in an sawp a, Italy el pha ber tura ngaih an ni.

Italy Squad
Goalkeepers: Gianluigi Donnarumma (Milan), Alex Meret (Napoli), Salvatore Sirigu (Torino)

Defenders: Francesco Acerbi (Lazio), Alessandro Bastoni (Inter), Leonardo Bonucci (Juventus), Giorgio Chiellini (Juventus), Giovanni Di Lorenzo (Napoli), Emerson (Chelsea), Alessandro Florenzi (Paris), Leonardo Spinazzola (Roma), Rafael Tolói (Atalanta)

Midfielders: Nicolò Barella (Inter), Federico Bernardeschi (Juventus), Federico Chiesa (Juventus), Bryan Cristante (Roma), Jorginho (Chelsea), Manuel Locatelli (Sassuolo), Lorenzo Pellegrini (Roma), Stefano Sensi (Inter), Marco Verratti (Paris)

Forwards: Andrea Belotti (Torino), Domenico Berardi (Sassuolo), Ciro Immobile (Lazio), Lorenzo Insigne (Napoli), Giacomo Raspadori (Sassuolo)