Hna hautakin Liverpool a hmuak

Liverpool chuan zanin dar 1:30-ah Champions League round of 16 second leg khel turin Atletico Madrid an mikhual dawn a, 1-0 a an tlawm sa avangin an hmabak a hautak hle. 

Reds hian Atletico defensive game mawi tak chu first leg-ah an ngam lo a, si phur sain an awm phah - zaninah game a danglam tam dawn lo tih a chiang a, Jurgen Klopp leh a nauten Atletico tlarhnung ṭhiah dan an ngaihtuah a ngai a ni. 

Klopp hian, "Anfield boruak an tem ve ang," tiin Atletico hi an ngam loh hlim khan a vau lawk a, khawvela fans ṭha ber pawla sawi Kop ho nen an mualah Spanish club ṭha an ngam theih a inbeisei. Liverpool hian Premier League nomawi chawi turin league match hnih chak bak an mamawh tawh lo a, an boruak ṭhat vanglai tak a nih avangin Champions League hi awlsam taka mangṭha an tum lo ang. 

Liverpool-in first leg-a Atletico an ngam loh hnuah an chesual zui a, league-ah Watford an ngam lo a, Chelsea-in FA Cup aṭangin an pet chhuak bawk. 

Mahse, Reds hian an beidawng ve ngai lo tih pholangin an league match hnuhnung berah Bournemouth chu 2-1 in an hneh a, Anfield boruak a nung thar leh ta. Liverpool hian UEFA Super Cup leh FIFA Club World Cup nomawi an chawi tawh a, Premier League-ah an champion ngei dawn a, Champions League nomawi chawi tel an duh ang. Chumi tur chuan Mohamed Salah, Roberto Firmino leh Sadio Mane chet ṭhat a pawimawh leh dawn a, player pathumin an theihna anga an khelh chhuah phawt chuan Atletico tlarhnung tan pawh dan a harsa ang. 

Atletico nen an intawn hmasaka inhliam Jordan Henderson chu Liverpool tana inlan turin a dam leh tawh a, English midfielder tel loa Liverpool talbuaizia hretu tan chuan Hendo lo kir tur thu hriat hi chanchin lawmawm a ni.

Liverpool-in tun season-ah Hendo tela an khelhin 82.4%-ah hnehna an chang thei a, club captain tel loa an khelh match-ah erawh 52.3% bak an chak phak lo. Midfield-a Hendo a awmin Giorginio Wijnaldum tan tlarhmaah 'free' zawka tlan theih a ni a, hei hian Salah, Firmino leh Mane hlauhawmna a belhchhah ṭhin. Mahse, Liverpool fan-ten Hendo an chhawr theih tur thu an hriat rualin Alisson inhliam thu an hria a, Brazilian keeper hian Reds tan Atletico lakah si ban a nghak thei dawn lo - Adrian chuan Alisson ai a rawn awh ang. 

Liverpool tan chanchin lawmawm lo tak hriat tur a awm - Atletico Madrid an dam kim! Diego Simeone-a'n Anfield-ah a duh ang taka hman tur player a nei thei dawn tihna a ni a, an ṭhat dan berin Reds hneh an tum ang. 

Match hnuhnung bera Sevilla laka inhliam Alvaro Morata chuan club training zawm lo mah se Reds a hmachhawn a beiseiawm a, Spanish chanchinbu AS chuan inven nana training lo satliah a nih thu an tarlang. 

Kieran Trippier leh Joao Felix te pawh an dam ṭha a, Atletico hian Reds petchhuah an tum a nih chuan player pahnih hi an pawimawh dawn - Trippier hi Liverpool hrechiang ber tur a ni a, Felix hi khawvel tlarhnung tu mahin ven an chak lo. Sevilla laka squad-a tel lo Renan Lodi chuan dan pangngaiin training a zawm leh tawh a, Reds nen an inkhelh hmasak zawka inhliam Thomas Lemar pawh a dam leh tawh - Simeone-a'n tun hi season kal laia player duhthlan tur a ngah ber ṭum a ni. 

Liverpool fan-ten a êng lam an thlir a nih chuan Atletico hian tun season-ah beisei an phak lo a, result ṭha an nei ṭan ve dawn ta maw tihah an tawlhthlu leh ṭhin. Reds an ngam hnu khan Villarreal chu 3-1 in hneh mah se Espanyol (1-1) leh Sevilla (2-2) lakah hnehna an chang zo lo a, Spanish club 'vantlang' pahnihin Atletico lakah goal an khung theih chuan world class forward pathumin a 'kalkawng' an hre tur a ni. 

Atletico hi Spanish Cup aṭangin petchhuah an ni a, season thara Champions League khel thei lo dinhmunah an ding mek bawk - mahse hei tak hi Liverpool tan chuan an hlauhawmna tur a ni thei. 

Simeone-a naute hian nomawi chawi miah loa season mangṭha an chak lo ang tih a hriat a, Spanish football-a an season duhawm lo hi European football hmanga thawi dam an tum ang.