KDB-a'n Belgium squad a zawm dawn

Belgium fan-te tan thu hriat nuam em em hriat tur a awm a, an thiampuipa Kevin de Bruyne chuan a hliam avanga zai tenau a tawh hnuin vawiin hian an ram team a zawm ve dawn.

Manchester City midfielder hian Champions League final-a Chelsea nen an inkhelh ṭumin a hnar ruh leh mit ko ruhah hliam a tuar a, Chelsea defender Antonio Rudiger nen ball an inchuhna lama hliam avang hian Euro 2020 a khelh theih loh mai hlauhthawnna a awm hman.

Mahse, Belgium coach Roberto Martinez chuan, "An zai chhung hi minute 20 bawr vel chauh a ni a, engkim tluang takin a kal vek a ni. Thui zawka thil thlirin hetianga inenkawl hi a ṭha a, dam turin hun a duh rei lo ang.

"Medical staff lam pawh a hliam zai result avangin an lawm a, Thawhṭannia kan squad a zawm ve hun tur hi nghakhlel takin kan thlir a ni," a ti.

Major tournament-a a vawi khat nana champion beisei Belgium hian nizan khan Croatia nen friendly match an khel a, he thu buatsaih a nih lai hian result kan hre hman lo.

Euro 2020-a an match hmasa ber chu June 12 zanah Russia nen an khel dawn a, Denmark (June 17) leh Finland (June 22) an hmachhawn zui bawk ang - Belgium awmna hi group B niin, last 16 chu harsa lutuk loa lut mai tura ngaih an ni.