Man City kutah Premier League award

Premier League champion Manchester City-in Premier League award lian pathum an hui vek. Portuguese defender Ruben Dias chu player of the season-ah thlan a ni a, Spanish manager Pep Guardiola chu manager of the season-ah thlan niin Phil Foden-a'n young player of the season lawmman a dawng.

Goal of the season atan Tottenham Hotspur midfielder Erik Lamela-a'n March 22, 2021-a Arsenal lama a khung chu thlan a ni a, Argentine midfielder hian hmun chep tak kar aṭangin 'rabona kick' hmangin mawi zetin a pet goal.

Bang rinawm Dias
Manchester City-in season li chhunga a vawi thum nana Premier League nomawi an chawi theih nan defender Ruben Dias a pawimawh hle. Kum 24 mi Dias-a hoin Man City hian match 15 chhung a zawnin an chak a, Premier League history-ah chak zawn rei palina an ni.

Dias hian Man City hi vawi 15 a cleansheet pui a, match 32 a inlanah vawi 23 a chakpui. Portuguese defender hian interception vawi 35, tackle vawi 24 , block vawi 23 leh ball lak sak vawi 135 a nei a, Man City-in League Cup leh Champions League final an thlenna kawngah a pawimawh bawk.

Kum 24 mi Dias hi defender zinga Premier League player of the season dawng thei palina a ni a; Manchester United defender Nemanja Vidic, City captain hlui Vincent Kompany leh Liverpool defender Virgil van Dijk ten chawimawina hi an dawng tawh.

Portuguese player zingah chawimawina dawng thei pahnihna a ni a, Cristiano Ronaldo khan Man Utd tana a khelh laiin 2006-07 leh 2007-08 khan chawimawina hi a lo dawng tawh. Award dawng tur hi Premier League captain 20, football expert leh mipui vote hmanga thlan a ni.

Pep 'hattrick'
Pep Guardiola hnuaiah Manchester City-in vawi thum Premier League nomawi an chawi a, Spanish manager hian nomawi a chawi season 2017-18 leh 2018-19 ah chawimawina hi a dawng tawh bawk.

Spanish manager Guardiola hian manager ropui Arsene Wenger leh Jose Mourinho te nih rualin a vawi thum nan chawimawina hi a dawng a, vawi 11 chawimawi dawng thei Sir Alex Ferguson chiah a tluk lo.

Ku 50 mi Pep hi manager dang Marcelo Bielsa, David Moyes, Brendan Rodgers leh Ole Gunnar Solskjaer ten an tluk pha lo.

Foden-a'n a phu
Kum 21 mi Phil Foden-a'n Young Player of the Season award a dawng a, Manchester City-in nomawi an chawi theihnaah hian English midfielder hi a langsar ber zinga mi a ni.

Young Player of the Season hi kum 23 leh a hnuailam tana buatsaih a ni a, Foden hian season hman zawh takah khan match 28-ah inlanin goal kua leh assist panga a nei. Man City-in 2019-20 champion Liverpool 4-1 a an hneh ṭumin Foden hian goal a khung bakah assist vawi khat a nei bawk.

Chawimawina dawng tur hian Foden bakah Dominic Calvert-Lewin, Ruben Dias, Illan Meslier, Mason Mount, Marcus Rashford, Declan Rice leh Bukayo Saka te thlanchhuah a ni a, Man City midfielder Foden hian vote a hmu sang ber.

Premier League Awards
Player of the season : Ruben Dias, Man City
Manager of the season : Pep Guardiola, Man City
Young player of the season : Phil Foden, Man City
Goal of the season : Erik Lamela, Spurs Vs Arsenal (March 22, 2021)