Match nga chak zawn thei Brazil
Brazil chuan football thiam bik ram an nihna an lantir zel. Inrinni zing khan Richarlison leh Neymar te goal hmangin an mikhual Ecuador chu 2-0 in an hneh a, Nilaini zingah Paraguay an lenchilh lehnghal ang.
Tite enkawl Brazil hian 2022 World Cup qualifier match nga an khelh tawhah an chak vek a, point 15 hmuin South America ram 10 inel zinga hmahruaitu an ni; khelh zat inangah pahnihna Argentina aiin point liin an sang zawk.
Goal hnih a tawk
Ecuador hian qualifier match an khelh hnuhnung palia vawi thum chak chungin Brazil an tlawh. Estádio Beira-Rio, Porto Alegre-ah inrintawkna sang tak nen an lenglut a, hun rei tak chhung chu an goal pawh an venghim thei.
Mahse, ball chang tam leh inkhel thununtu Brazil dan reng theih an ni lo. World champion vawi nga ni tawh Brazil tan Everton forward Richarlison-a‘n minute 65-naah goal hmahruai a khung a, ram tan match 24 a khelh aṭanga a goal kuana a ni.
Hun tawp hma chiahin Manchester City forward Gabriel Jesus-a‘n penalty a hlawh chhuak, a pet tura ding chhuak Neymar pet chu goalkeeper Alexander Dominguez-a‘n a lo dansak. Mahse, ball a pet hmain box chhungah player dang an lo lut hman a, chhuih nawn lehin a hlah tawh lo.
Hun tawp dawna penalty hian sawi a hlawh. Jesus hi box pawnah chiah a tlu nia ngaiin referee Alexis Herrera chuan free kick a pe, mahse VAR hmangin minute li ngawt an ennawn hnuah penalty an pe a, penlaty hi chhuih nawn a nih bawk avangin sawi a hlawh zual.
Hmabak a hautak
World Cup qualifier an khel mek a, hahchawlhna awm hman loin Copa America khelh a ni dawn bawk. Brazil hian Ningani zingah Paraguay an lenchilh dawn a, June 18 hian Copa atana an match hmasa berah Peru an hmachhawn dawn bawk.
Brazil coach Tite chuan, „Player te hian ngaihdan an nei ve a, chumi chu an sawi chhuak thiang. Player ṭhenkhat chuan Copa America khelh loh mai an duh, chuvangin kan captain Casemiro chuan thuneitu hnenah an ngaihdan hrang hrang a thlen,“ a ti.
Tite chuan sawi chhunzawmin, „Boruak hrang hrang leng vel karah Ecuador nen kan inkhelh tur chauh ngaihtuah turin ka ti a, kan duh ang ngeia kan khel chhuak thei kha ka lawm. Copa America hi a pawimawh a, chutih rualin tunah chuan Paraguay nen kan inkhelh tur a pawimawh zawk,“ a ti.
Copa American hi a tirah chuan Argentina leh Colombia te thlen tur a ni a, hrileng vangin an thleng thei lo. Hun tepter tawh takah Brazil hian a thlen a ngai dawn, inlan tur ram dang pawhin inbuatsaihna an nei mumal hman dawn lo hle.
