Spain tan Ramos awm loh a lang lo

Luis Enrique-a'n Euro 2020 khel tur Spain squad a puang a, player 26 thlan theihah player 24 chauh thlang chhuakin Sergio Ramos a ko lo.

Barcelona manager hlui thutlukna hian sawisel hlawh mah se friendly match-a Portugal nen goal awm loa an inhnehtawk hnuah erawh Enrique thutlukna thlawptu an tam ang.

Zirtawpni zan khan Estadio Wanda Metropolitano-ah Spain-in Euro champion lai Portugal a mikhual a, Cristiano Ronaldo meuh pawh inlan mah se minute 90 chhunga team ṭha zawk La Roja an ni.

Portugal hian Spain tlarhnunga Aymeric Laporte leh Pau Torres te inkawp an su tlang thei lo a, chance insiam an harsat. Spain erawh midfield-ah Thiago Alcântara, Sergio Busquets leh Fabián Ruiz te midfield-ah an awm a, Spain lakah inkhel an thunun hle.

Spain hian Ramos-a awm loh an tuar lo a, chutihrualin tlarhmaah erawh goal khung thei striker an an mamawh. Álvaro Morata-a'n chance ṭha a hlah nual a, hun tawp hma deuhin keeper Rui Patricio chiah a hmachhawn hnuah crossbar a pet per.

Kum 28 mi Morata-a'n chance ṭha bik a hlah avangin inkhel entu ṭhenkhatin an 'boo', amaherawhchu Spain-in champion rinkai zinga mi Portugal laka inkhel an thunun dan thlir chuan inkhel entute hi lawm tur zawk an ni.

Kum 51 mi Luis Enrique chuan, "Morata kha a thawkrim em em a, chutichung chuan hun tawp dawnah khan 40m a la khalh thei a, keeper a la bum thei a, a vanduai mai a ni. Ka thlirna aṭang chuan nasa taka fak tur zawk a ni a, chutihrualin football hre tlem ber ka ni thei bawk," tiin na takin a player a chhan.

Spain hian June 8, Thawhlehni zan ah Lithuania nen friendly match an khel dawn a, Portugal hian June 9, Nilaini zanah Israel nen friendly match an khel leh bawk ang.