Vawiinah NECS Cup khel ṭan dawn

Aizawl district huam chhunga veng/khua inelna NECS Cup 2020 Inter Village Football Tournament chu vawiinah khelh ṭan a ni dawn ta a, vawiinah match li khelh tur a awm nghal ang. Team 58 inelna tur NECS Cup first round hi Ramhlun Sports Complex-ah khelh tur a ni dawn a, round of 16 aṭangin AR Lammual emaw Rajiv Gandhi Stadium-ah emaw khelh tur a ni ang. 

NECS Cup hi knockout hmanga khelh tur a nih avangin vawi khat chak loh chu inelna mangṭha nghalna tur a ni dawn a, team tin inpuahchahna a ṭha ang tih a chiang. First round leh second round bikah first half leh second half-ah minute 40 ve ve (40+10+40) khelh tur a ni dawn a, hun pangngaiah inhnehtawk an awm a nih chuan penalty hmangin chak zawk zawn tur a ni dawn a ni. 

Round of 16 aṭangin inelna kalphung thlak a ni dawn a, inkhelh hun chhung pawh a rei sawt dawn. Inelna ṭantir lama minute 80 inkhel chu minute 90-ah tihsan a ni dawn a, first half leh second half-ah minute 45  (45+15+45)  ve ve khelh tur a ni ang. A thiam 16 chin inelnaah hian hun pangngaia inhnehtawk an awm a nih chuan penalty pet nghal mai loin extra time khelh tur a ni dawn a, extra time hi 10+5+10 khelh tur a ni. 

Aizawl District Foot-ball Association buatsaiha neih tur inelnaah hian champion chu Rs. 1,70,000/- ngawtin an hausak belh dawn a, pahnihna sum dawn tur pawh  Rs 80,000/- a tling. Semifinal-a chak zo lo team pahnihin Rs 10,000/- ve ve an dawng dawn a, fairplay leh fans nei ṭha team-te chuan (Community award) Rs 10,000/- tho an dawng bawk ang. Team tel zawng zawngin consolation prize an dawng dawn a, best player leh top scorer tan Rs 5,000/- ve ve dawn tur a awm bawk.