Rashford captain-na hnuaiah England an chak

Manchester United forward Marcus Rashford chuan a vawi khat nan England captain armband a hreng a, Romania lakah inkhela goal awmchhun khungin a team chu 1-0 in hnehna a chanpui.

Rashford goal khung hi penalty aṭanga lut a ni a, Liverpool captain Jordan Henderson-a'n penalty aṭanga goal khung belhna remchang nei mah se a chhawr lo thung. England boss Gareth Southgate-a'n Euro 2020 khelh hmaa an friendly match hnuhnung ber hi 'inenchhin' nan a la hmang a, squad-a tel lo Ben Godfrey, Ben White leh James Ward-Prowse te chu bul ṭantir an ni.

Inkhelh zawhah Brighton & Hove Albion defender Ben White-a'n chanchin lawmawm hriat tur a nei zui a, hliam vanga inlan thei lo tur Trent Alexander-Arnold hmun ruakah koh a ni.

Enchhinna chu
Southgate-a'n Champions League final khel Chelsea leh Manchester City player-te a la chhawr thei rih lo a, Ben Chilwell, Reece James, Mason Mount, Kyle Walker, John Stones, Phil Foden leh Raheem Sterling-te chu squad-ah an awm lo.

Hetiang boruak karah hian Rashford chuan rin loh takin captain armband a rawn hreng a, kum 23 leh ni 218 mi niin mihang player zinga Three Lions tana captain ni thei naupang ber record-a rawn siam.

Minute 68-naah Rashford hian a pu lawmna a rawn siam zui a, Jack Grealish penalty hlawhchhuah chu harsatna nei loin goal-ah a chantir - ram tan match 41-a khelha goal 12 a khung tlinna chiah a ni.

West Bromwich Albion keeper Sam Johnstone chuan ram tana a match hmasa ber a khel bawk a, Premier League aṭanga relegate hlim player hian ram tana a match hmasa berah a khel chhe lo - Andre Ivan khung tur nia lang a dante chu pui tak a ni.

Hendo a phur mah mah!
Southgate-a'n hliam nei chungin Henderson a ko lui a, Liverpool captain hi hruaitu ṭha a nih avang leh squad-a player dang tiphur thei a nih avanga ko a nih thu a sawi.

Romania lakah February 20 hnua la inlan leh lo midfielder hi bench aṭanga luhtir a ni a, minute 45-naah Leeds United midfielder Kalvin Phillips a rawn thlak. Minute 78-naah Everton striker Dominic Calvert-Lewin-a'n penalty a hlawh chhuak a, Hendo-a'n captain a nihna pholangin pet a chuh - mahse, keeper Florin Nita tana man nuam tawk velin a pet a, a pet goal lo.

Hendo-a'n penalty pet goal lo mah se a khel a pangngai viau a, chutihrual chuan an match khelh hi friendly match a nih bakah Romania an hmachhawn a, Euro 2020-a an match hmasa lama inlan tur chuan Hendo tan a la hma hretin a rinawm.

Grealish a ṭha
England tan Jack Grealish bawk chu player hmuhnawm a ni a, Aston Villa captain hi a team inkhel awi nungtu a ni a, chance hlauhawm a siam reng a, Southgate-a'n Euro-ah a chhawr tak tak ang em, tih chu zawhna awm a ni.

Southgate hian Grealish-a khelhna anga khel thei Mason Mount leh Phil Foden a la nei a, English coach tan thutlukna siam a awlsam dawn lo tih a lang. Romania lakah Rashford, Calvert-Lewin leh Jadon Sancho-te an khel ṭha vek bawk a, tlarhmaa goal nawr lamah chuan England hi an ngaihtuahawm dawn loh. Calvert-Lewin leh Sancho hian woodwork an tih per ve ve.

Chutihrual chuan Harry Kane a awm miau avangin Calvert-Lewin tan Euro-ah bul ṭan tura inbeisei chi a ni lo a, thachhang dawltu atana ṭha tak erawh a ni tih a lang - Rashford leh Sancho tan bul ṭanna chance a sang thung a, Kane nen an pathuma an inkawp thei a nih chuan a hmuhnawm ang.

Hei le White
Southgate-a'n England squad-a puan ṭumin rin loh takin right back pali a ko a, Austria nena an inkhelah Arnold a inhliam zui - Liverpool defender a inhliam takah chuan a hmun ruak luah tur zawn a ngai.

England boss hian tlarhnung lam hnuchhawnin Ward-Prowse emaw Jesse Lingard a koh a rinawm a, mahse, rin loh taka thutlukna siamin defender bawk a ko - a hming chu Ben White a ni.

Manchester United captain Harry Maguire chu inkhel thei loin a la inhliam mek a, hei vang hian June 13 zana an match hmasa berah Croatia-a hmachhawn thei dawn lo - Southgate-a'n Maguire-a chunga thil thleng thei ngaihtuah chungin White hi a ko niin a lang.

Kum 23 mi defender hi eng level-ah pawh tun Euro provisional squad-a telh a nih hma kha chuan ram tana inlan tura koh a la ni ngai lo a, England tana koh a nih hmasak berah major tournament a hmachhawn nghal dawn.

"Kha aia nuamsa zawka chak thei kha kan ni a, mahse, Romania pawhin chutiang chiah chuan an sawi thei. First half-ah ball kan ken loh laiin kan thawkrim tawk lo a, kan khelh dan a darh sarh lutuk avangin kan nawr na lo bawk. Chawlhlawk hnuah kan zia hret a, 4-3-3 a kan formation kan thlak kha kan tan chuan inbuatsaihna ṭha tak a ni tel nghal. Player-ten inkhelh tam an mamawh a, zir tur a awm zel bawk. Hnehna kan chan avangin ka lawm a ni." - Gareth Southgate, England manager