Federer a inhnukdawk

Roger Federer chuan French Open last 16 lut mah se hliam vangin a khel chhunzawm thei dawn lo. Swiss star hian a khup dinhmun ngaihtuahin a team lamin inkhel zui lo tura an tihna chu a pawm a ni.

Grand Slam vawi 20 champion tawh Federer hi a khup hliam vawi hnih zai a ni tawh, a dam hnuah a la inkhel tam lo. Inrinni zan khan match hautak a khel a, inkhelh zawhah a taksa dinhmun ngaihchan a ngaih thu a sawi chhuak.

Ruahman dan chuan Thawhṭanni khan last 16 khel chhunzawm tur a ni, mahse Pathianni zan khan a inkhelh theih tawh loh tur thu a tichiang. Hliam bakah tun thla tawpa khelh tur Wimbledon atan rilru leh taksa 100% a inpeih a duh vang a ni.

Kum 39 mi Federer chuan, "Inelna tir lamah kha ka beisei aiin ka khel thei a, taksa pawh a ṭha viau. Mahse kum khat deuh thaw inenkawl tawh ka nih avangin harsatna a awm ta tlat a, ka hriselna dinhmun ka ngaihtuah a ngai ta zawk.

"Match thum ṭha taka khelh hnua inhnuhdawh hi thil hrehawm tak a ni, chutih rualin tennis court chhunga ka lo kir leh thei erawh lawmna tur a ni," tiin a sawi a, chawlh mai a la tum lo.

French Open mipa singles huangah hian Rafael Nadal leh Novak Djokovic an la dam a, anni pahnih hi semifinal-ah an intawng thei dawn. Player langsar dang Alexander Zverev leh Daniil Medvedev te pawhin kawng dik an la zawh ve bawk.