Paul vs Mayweather : YouTube star a ding tlang!

Khawvel ngaihven exhibition fight-ah nimin khan Logan Paul leh Floyd Mayweather-te an inhnek ta nge nge a, mahse, exhibition fight a nih angin chak zawk erawh puan a ni lo.

Miami khawpuia inhnekah hian mi tam tak chuan Mayweather hian Logan Paul hi a knockout mai an ring a, mahse, round riat an inhnek chhungin YouTuber lar hi a tlu duh lo - khawvela boxer ṭha ber ang hiala mi tam takin an ngaih hmaah a ding tlang.

Inhnek thununtu Mayweather chuan, "Round riat thleng a daih hrim hrim pawh kha a tan chuan hnehna a ni a, kan sum dawn tur zat a hriat hunah hnehna chang zawk chu kan hre mai ang chu," a ti zui!

Exhibition fight neih a nih hmaa dollar maktaduai 100 tal hlawh tur anga sawi Mayweather hian dollar maktaduai 50 vel hmuh a inbeisei thu a sawi a, Logan Paul hi dollar maktaduai 20 vel hlawh tura ngaih a ni thung.

Mayweather hian a khingpui chu fak zuiin, "Paul khan min barakhaih a, ka rin aiin a ti thei phian a ni, " a ti a, "Kum 21 ka ni tawh lo tih inhriat a ngai a, kum naupang zawkte nena infiama hetianga hun hman hi a nuam ve a ni," tiin an inhnek chu 'hlimawm' a tih thu a sawi.

Paul chuan, "Khawvela boxer ropui ber pawl ka hmachhawn hian eng pawh tih theih a nihzia a pholang a ni," a ti a, "Ka nuna ka hun tawn ropui ber a ni," a ti zui.

Kum 26 mi Logan Paul hian amah ang thoa YouTuber lar KSI chu lo hmachhawn tawhin a tlawm a, Mayweather a hmachhawn hi fight a hmachhawn vawi hnihna chauh a ni - mahse, judge an awm lo a, fighter pahnih professional record-ah he inhnek hi ziah luh a ni dawn lo.

Paul chuan, "Mayweather khan min khawngaih mai mai em ni, tih ngaihtuah chungin ka haw dawn a ni," a ti zui a, kum 44 mi boxer ropui hmaa a tlu lo chu mak a ti hle.