Serena Williams a tla leh ta

Tennis player ropui bik ni mah se Serena Williams tan a duh zawng zawng neih theih a ni bik lo. American star hi French Open last 16 aṭanga vuak tlak a ni a, a tum ram thleng zo loin Paris khawpui a chhuahsan a ngai leh dawn ta.

Pathianni zan inkhelah Serena hi Elena Rybakina lakah 6-3, 7-5 in a chak lo. Darkar khat leh minute 17 an inkhelh chhungin Serena hian a service vawi nga a hloh a, nidanga a ball vuak na leh dik tak ang kha a chhawp chhuak thei lo.

Grand Slam vawi 23 champion tawh Serena hian record nei ṭha ber Margaret Court-i (24 titles) nihrual tumin a bei rei ta hle. Major tournament-ah final a khelh hnuhnung pathumah a chak lo vek a, tunah chuan final pawh a thleng phak ta lo.

French Open atan hian 'Ka tawp san lo ang' tih inziahna pheikhawk a bun a, taksa bakah rilru lam pawh nasa takin a inbuatsaih. Mahse, tunah chuan tun thla tawpa khelh tur Wimbledon a nghah a ngai rih leh ta zawk.

Kum 39 mi Serena chuan, "Mi tam tak chuan French Open atan ka hun a liam tawh niin an ngai mai thei, ka ngaihdanah erawh chuan beisei tur a a la awm. Inkhel zawng zawngah chak theih a ni bik lo, tun ṭumah pawh khan vannei ila chuan tlang zawk thei ka ni," a ti.

Serena hnehtu Rybakina tan erawh dai ngai loh ram a ni, a vawi khat nan Grand Slam bikah quarterfinal a lut. World number 2 hian a match lehpekah Anastasia Pavlyuchenkova a hmachhawn leh ang, ani hian Victoria Azarenka a lo vaw tla ve thung a ni.