Euro U21-ah Germany an champion

European Under-21 Cham-pionship final chu Pathianni zan khan Slovenia khawpui Ljubljana-ah kheh a ni a, Germany-in Lukas Nmecha goal hmangin Portugal 1-0 in an hneh.

Manchester City forward Nmecha hian goal li khungin top scorer a ni a, Portugal midfielder Fabio Vieira chu best player atan thlan a ni. Germany hi Euro U21-ah vawi thum an champion tawh a, vawi nga champion tawh Spain leh Italy te chiah an tluk lo.

Final chu
Stozice Stadium-ah entu 4,883 an pungkhawm a, Germany leh Portugal ten football hmuhnawm an lantir. Kum 1994 khan Luis Figo telna Portugal golden generation an tihte chuan final hi a lut a, final-ah Italy lakah 1-0 in an vanduai.

Portugal hian Euro U21-ah nomawi an la chawi lo a, final-ah pawh bul an ṭan ṭha hret. Sporting forward Tiago Tomas-a'n goal pawnah chiah a pet chhuak a, Manchester United defender Diogo Dalot-a'n Germany tlarhnung tan buaina a siam bawk.

Germany tlarhnung an lian ṭha a, Portugal-in an su tlang thei lo. Stefan Kuntz-a kaihhruai Germany team an insiamrem a, Florian Wirtz-a'n crossbar a pet per a, captain Arne Maier-a'n hla tak aṭangin ṭha zetin a pet bawk.

First half hun pek belhah Portugal midfielder Vitinha-a'n chance ṭha bik a nei a, keeper chiah a hmachhawn hnuah a duh tui hret avangin a khung lo.

Germany tan right back Ridle Baku a khel ṭha a, Wolfsburg defender ball fing tak chu Lukas Nmecha-a'n keeper bum nan hmangin minute 49-naah goal pawimawh a khung.

Portugal-in siphurh sut tumin na takin an nawr a, counter attack hmangin Germany-in chance ṭha an neih phah. Substitute Karim Adeyemi-a'n keeper Diogo Costa chauh a hmachhawn hnuah a pet goal lo. Hun tawp thlengin inkhel boruak a sang a, Germany an ṭang tluan.

Man City striker
Germany striker Lukas Nmecha hi Manchester City academy chhuak a ni a, England tan kum bithliah inelna hrang hrang Under 16 aṭanga Under 21 thlengin a khel tawh. English club tan khelhna hmun a chan loh avangin Preston North End, Wolfsburg, Middlesbrough leh Anderlecht-ah te loan-in a kal.

Season liam ta khan Nmecha hian Anderlecht tan khelin league-ah goal 18 a khung a, kum 22 mi striker hi Euro Under 21 a hman ṭhat avangin Man City aṭanga lakchhuah tum an awm nual ang.