Young hoin Hawks an chak hmasa

Nimin zing NBA Eas-tern Conference semifinal game 1 inkhelah Atlanta Hawks an chak. Hawks hian Trae Young-a point 35 neih hmangin Philadelphia 76ers lakah 128-124 in hnehna an chang.

Playoff hi best of seven series hmanga chak zawk zawn a ni. June, 9 Nilaini zingah game 2 an khel leh ang, vawi li chak hmasa zawkin conference final an lut dawn a ni.

Regular season lamah Young a hmuhnawm a, playoff chinah pawh a mikhual lo. Kum 22 mi hian a thiamna hmangin 76ers a chhaih buai hneh hle a, regular season bika chungnung zawk 76ers hi a tawp lamah che ṭha mah se bul an ṭan fuh loh an tuar.

76ers coach Doc Rivers chuan, "Keini aiin an khel ṭha zawk, basket neih tumin an bei nasa zawk bawk. Min nawr nat em avangin kan chiai deuh niin a lang, kan insiamṭha nghal ang," tiin an tlawm loh thu a sawi.

Eastern Conference semifinal lehlamah Milwaukee Bucks leh Brooklyn Nets an inkhel ve bawk a, game 1-ah Nets an chak. Semifinal aṭanga tlang team ten conference final an zawng leh dawn a, chumi hnuah conference pahnih champion ten NBA Finals an khel ang.

Nimin zing khan Western Conference lamin playoff round 1 an khel zo ve chiah. Los Angeles Clippers chuan Dallas Mavaricks lakah 126-111 a hnehna changin series 4-3 in an la.

Clippers tan hian Kawhi Leonard-a'n point 28 a neih bakah rebound vawi 10 a la. Marcus Morris Sr (23 point) bakah Paul George (22 points & 10 assist) te an che ṭha hle bawk.

Conference semifinal-ah Clippers hian Utah Jazz an hmachhawn leh dawn. Jazz hi table hmahruaitu ni chunga regular season khar an ni a, playoff-ah Memphis Grizzlies an sawp tawh bawk.

Nimin Inkhel Result
Conference Semifinal
Game 1: Philadelphia 76ers 124 - 128 Atlanta Hawks

NBA Playoff Round 1
Game 7: Los Angeles Clippers 126 - 111 Dallas Mavaricks
(Clippers lamin 4-3 in series an la)