CONCACAF Nations League champion hmasa ber UYSSA
Tun hnaia football ram ṭhangduang ber pawla sawi United States of America chu CONCACAF Nations League-a champion hmasa ber an ni a, extra time khelh a nih hnuah Mexico chu 3-2 in an hneh.
Mexico tan FC Porto right back Jesus Corona chuan minute hnihna lekah goal hmahruai a khung a, US-in Borussia Dortmund attacking midfielder Giovanni Reyna hmangin an chhanglet.
Denver, USA-a inkhelah Mexico tan Diego Lainez chuan hmahruaina goal a khung nawn leh a, US-in Juventus midfielder Weston McKennie hmangin an chhanglet ve leh - minute 90 chhunga goal dang a luh loh avangin extra time khelh a ni.
Minute 114-naah USA vanneihna a her chhuak a, Mexico defender pahnihin an tih tluk Christian Pulisic chuan penalty-a hlawh chhuak - referee-in a tirah penalty pe lo mah se VAR a rawn hnuah penalty spot-a kawk a, Chelsea midfielder-in goal a chantir turin harsatna a nei lo.
Inelna kalphung
CONCACAF Nations League hi September 2018 aṭang khan khelh ṭan a ni tawh a, North America, Central America & Caribbean hnuaia ram 41-te inelna tura tih a ni.
Qualifying round aṭanga bul ṭan a ni a, team 41 tel turah FIFA hremna avangin Guatemala an inlan thei lo - CONCACAF FIFA World Cup 2018-a fifth round-a lut team paruk Mexico, Costa Rica, Panama , Honduras, Trinidad & Tobago leh United States-te chuan qualifying round an khel ve lo.
Team 34 hi qualifier-ah match li ṭheuh khelhtir an ni a, home match leh away match hnih ve ve an khel - chumi zawhah table siam leh a ni. A sang parukin League A-ah World Cup qualifier fifth round-a team paruk an zawm.
League B-ah team 16 an awm a, league C-ah team 12 an awm bawk - League A-a khelte leh League B-a a sang zual palite hi 2019 CONCACAF Gold Cup-ah an tling nghal bawk.
Final chu
League A-a team 12-te chu group A-D ah, group pakhata team pathum zel awmin ṭhen hran an ni a, group tina a sang ṭheuh hian Nations League finals an lut a, semifinal hmanga final lut tur zawn a nih hnuah final hi khelh a ni.
US leh Mexico hi ram inhal tak an nih avangin CONCACAF Nations League final boruak a 'hot' takzet a, USA-in penalty an hmuh avanga referee laka che mawi lo Mexico coach Gerardo Martino chu hnawhchhuah a ngai hial.
Mexico hian penalty hmanga 3-2 a an hnufual hnuah penalty hmanga result thlak danglam turin chance an nei leh a, mahse, Mark McKenzie handball vanga an penalty hmuh hi Real Betis midfielder Andrés Guardado chuan goal-ah a chantir thei lo.
Penalty dangtu keeper hi bench aṭanga luhtir Ethan Horvath a ni a, Club Brugge-a khel mek keeper hi final khelhna Denver khaw tlangval a ni. Kum 25 mi keeper chuan, "Bench-a ṭhut chuan keeper tan inkhelh a beiseiawm lo. Mahse, kan khua Denver-ah ngei hun lawmawm ka tawng a nih hi," tiin a sawi.
Inkhel Result
USA 3 - 2 (a.e.t.) Mexico
USA: Giovanni Reyna 27'; Weston McKennie 82'; Christian Pulisic 114' (P)
MEX: Jesús Corona 2'; Diego Lainez 79'