Baku khawpuiah Perez a chak

Motor ke chhia vangin Max Verstappen a tlan tluan thei lo a, champion lai Lewis Hamilton-a'n season kal laia a tlan chhiat ber ṭum a tawng bawk. Driver ṭha pahnih an chetfuh loh karah Red Bull driver Sergio Perez chuan hnehna a chang.

Pathianni zan khan Formula 1 Azerbaijan Grand Prix chu Baku khawhpuiah tlan niin, chak tura ngaih Verstappen chu lap nga chauh tlan hmabak an neih tawhah a car ke a chhia. Champion lai Hamilton pawh 15-naah a thleng hram a, hmahruaitu dinhmun luah theihna remchang a neih a bawh pelh.

Ferrari aṭanga a chhuah hnuah Sebastian Vettel a nui ve leh ta. Aston Martin car khalhtu hi pahnihnaah a thleng a, pathumna chu Pierre Gasly a ni thung. Hnehna changtu Perez hian championship table lamah a chunga awm Hamilton leh Max te a hnaih ve hret.

Mercedes driver Hamilton chuan a rang thei ang bera insiamṭhat an ngaih thu a sawi a, team boss Toto Wolff chuan Hamilton thusawi a pawmpui a, an chak lohna leh chet fuh tawk lohna siamṭhat nghal an tum thu a sawi.