A vawi khat nan Oliveira a chak

MotoGP season kal laiah Miguel Oliveira chu a vawi khat nan a chak. Pathianni tlaia tlan zawh tak Catalunya Grand Prix-ah Oliveira a thleng hmasa ber a, championship lama hmahruaitu Fabio Quartararo chu palinaah a thleng.

Portuguese tlangval, KTM bike khalhtu ni bawk Oliveira hnungah Johann Zarco a thleng a, inelna hi a tir aṭanga a tawp thlengin an in bei tawk hlawm hle - lap hnuhnung berah pawh an in pel tawn zak zak, a tawpah Oliveira a chungnung ta ber.

A hliam dam hnuah Marc Marquez chuan beisei a la phak thei lo. MotoGP vawi ruk champion tawh hi tun hnaiah a zawnin intlansiak pathumah a tlan tluan thei lo a, atan nomawi beiseina a awm tawh loh bakah insiamṭhat pawh a harsa tawh.

Oliveira chuan, "Inelna kha a awlsam lo hle, hnung lam aṭangin na takin min nawr reng a, chiai mai pawh hlauhawm tak a ni. Mi ṭhenkhatin min tlan pelh lai pawh khan ka buai duh lo thung, a tawpa ka chak erawh ka vannei hle," a ti.

Bike intlansiakna sang ber hi season kal laiah inelna vawi sarih an nei tawh, inelna pariatna atan June 20 hian German Grand Prix an tlan leh ang.